RT-PCR leh RNA extraction hmanrua Ṭhahnem tham tak Mizoramah a rawn thleng

Nimin khan Health minister Dr R Lalthangliana hoin Health & Family Welfare Board vice chairman Dr ZR Thiamsanga, MLA leh official-te'n an department hnuaia péng hrang hrangte hmalakna an thlir lêt a; nimin khan RT-PCR test kit leh RNA exatraction kit tam tham tak a rawn thlen thu tarlan a ni.

Dr R Lalthangliana chuan, Health department hnuaiah programme chi hrang hrang a awm thu sawiin, "Hengte hi péng hrang hrangin kan thawk a ni. Kan hmalaknate kan inhriatpui tawn a ṭul bakah kan ṭanho theihna lai te, hmachhawp bawhzui dante kan sawiho a pawimawh a ni," a ti.

Tun hnaia Guwahati-a Union Health Minister hoa an meeting chungchang sawiin R Lalthangliana chuan, "Mizoram leh hmarchhak state bik tan health sector-ah awmze nei zawka thu khat vua a kal a ṭul thu ka sawi," a ti a; NLCPR hnuaia 10% hmarchhak state tana dah hran chu hripui dona atana hman zung zung a nih theih nana hmalakpui turin Union Minister a ngen tih a sawi.

Ṭhutkhawma tarlan danin, Covid-19 donaa mamawh hmanrua, bungrua leh damdawi chi hrang hrang dinhmun a ṭha thawkhat a, RT-PCR test kit leh RNA extraction kit ṭhahnem tak a thleng thar a ni.

Swab sample endik rûnpui chu veng/khua 65-ah buatsaih a ni tawh a, sample 89,323 endik zingah Covid-19 vei mi 2,515 (2.81%) hmuh chhuah an ni a, endik rûnpui kalpui zui zel a ni. Hripui kai tlahniam zel mah se, inthlahdah phah nan hmang lo turin mipui an chah.

Mizoram State Health Care Scheme hnuaiah kum 2020-21 chhungin mi 1,13,720 an inziak lut a, Covid-19 medical reimbursement bill cheng nuai 49 vel an dawng tawh.

Mizoram State Cancer Institute-a cancer hemna khawl pakhat, kum 25 chuang an hman tawh chu khawl thar pathuma thlâk mek a ni a, chu'ng zinga khawl pahnih chu hman theih a ni ṭêp tawh a, hman phalna buaipui mek a ni. Khawl dang pakhat pawh peih ṭep a ni tawh bawk.