Khawzawl dist.-a khaw 27-ah Sikul hawn ṭan remtih a ni

Khawzawl District Disaster Management Authority chairman CC Lalchhuangkima, DC chuan nimin khan order chhuahin, an district-a khaw 27-ah sikul hawn remtih a nih thu a puang.

Khawzawl DC chuan, district headquarters - Khawzawl tih loah khaw dang zawngah chuan sikul hawng turin village task force leh SMC/SMDC-te'n thutlukna an siam thu a tarlang a, "Covid-19 positive awm lohna khuaahte August 23, 2021 aṭangin zirlaite nen sikul hawn phal a ni. Hemi chungchanga School Education department-in kaihhruaina (SOP) a siam zawm ngei tur a ni," a ti.

Sikul hawnna khua­ahte chuan hripui vei hmuh chhuah a nih chuan DC, zonal officer leh VTF-te'n ruahmanna an siam dawn a ni. Hetih lai hian, Puilo khuaah chuan Covid-19 positive hmuh chhuah thar a nih avangin sikul hawn hun tur chu ngaihtuah ṭhat leh a ni ang.