College-ah politics ken luh a thiang lo - Chief Minister

Government Aizawl College hnuaia Commerce Block, Mualpui, Salem Venga mi chu nimin khan chief minister Lal Thanhawla'n a hawng. CM chuan college-ah zirtirtute'n politics an ken luh a thian loh thu a sawi.

Chief Minister chuan college chu zirlaite tan an hmalam huna an eizawnna tur atana thiamna an zirna hmun a ni tih chian a ngaih thu sawiin, "College chhungah zirtirtuten politics an ken luh a thiang lo a, politics khelhna hmunah college hman a nih a piangin buaina lian tak tak a thlen ṭhin bakah zirlai tam takte hmalam hun tihchhiatsak a nih phah ṭhin," a ti.

Zirlaite chu hriselna dah pawimawh a, insiamṭhatna hun in neih laia ei leh in, zuk leh hmuam kawnga invawng thianghlim tur leh Mizoram hmabak an ni tih inhrechiang tura a duh thu hrlilhin Lal Thanhawla chuan, "Sorkar hna sang Mizote ta anga kan ngaih thin IAS, IPS, army officer leh a dangahte hniam lam kan pan mek a ni," a ti a, zirlaite chu theihtawp chhuah turin a fuih.

CM Hawla chuan sorkar laipui leh state sorkarin zirna an ngaih pawimawh ve ve thu sawiin, "Mizoram sorkarin a din, Mizoram Education Reform Commission rawtnate pawh state sorkarin a sum neih leh theihna chinah Mizoram hmasawnna atan leh ṭhalaite tana khawvel thar siamna hmanrua atan a hmangchho mek zel a ni," a ti.

Khualzahawm Higher & Technical Education minister R Romawia chuan hnam ṭhang mekten changkanna ringawt dah hmasa a, an hnamzia leh ṭawngte an thlahthlam apiangin hnam angin an boral ṭhin tih sawiin,"Zonunmawi vuat bet tlatin Mizo hnam zia leh ṭawngte humhalh chunga tunlai hmasawnna leh changkanna neih tuma midangte el a pawimawh," a ti a, hnam chimralna laka himna chu hnamdangte aia thluak leh thiamnaa chungnun zawk a nih thu a sawi.

GAC Commerce Block hawn inkhawm principal Lalrinawma'n kaihruaiin, PWD CE Lalmuankima Henry-in building sak a nih dan a sawifiah.

Commerce Block hi Special Plan Assistance sum cheng nuai 300 hmanga sak a ni a, chhawng thum niin, sq. metre 1049-a lian a ni. Zirlai 60 zel ṭhut lenna tur classroom paruk, staff room, library, office, store room etc. a awm.