KMMTTP hna thawk-tute la dang zui zel

Lawngtlai District Land Owners Association (LDLOA)-in Kaladan Multi Modl Transit Tran­sport Project (KMMTTP) kawng sialna atana an ram sorkarin a lakah zang­nadawmna pek phûtin kawng siamtu company-te hna thawk tur an la dang chhunzawm zel.

Lawngtlai aṭanga thu dawn danin, Zang­nadawmna pek an phût avang hian LDLOA hian February 20, 2018 aṭang khan KMMTTP kawngpui chu kawng siamtu leh mipui kal theih loh turin an dang.

Ni hnih an dan hnuah, kawngpui chu mipui tan bik February 22 aṭangin an hawng a, kawng siamtute hna thawk tur erawh an dang zui zel a, nimin thleng khan an la dang ta zel a ni.

LDLOA hruaitute hi Lawngtlai DC Dr Arun T chuan February 22 khan a pisaah a lo kâwm tawh a, zangnadawmna phûttute thil duh a bawhzui dan leh a hmalaknate leh sorkar hotu lute hnena lehkha a thawn dante a sawipui a ni.

Lawngtlai DC hian kawngpui dan chu titawp turin ngen mah se, LDLOA chuan an thil phût vanga an hmalakna chu tàwpsan mai chi niin an hre lo. Chutih rualin, mipuiin harsatna an tawh loh nan kawngpui dan mek hawngin, kawng siamtu company pahnih - RDS Pvt.Ltd. leh Atlanta RSS-te hnathawk tur erawh chu tiam chin awm loin an la dang ta zel a ni.

Sorkar tarlan danin, KMMTTP kawngpui laih mekin a paltlang ram neitute zinga mi 160 vel chuan zangnadawmna an la tawh a, la la lo mi 300 vel an awm.