KHAWTHLIR

Zu bilh lai man
Excise & Narcotics department Prosecution Branch leh Anti-Narcotics Squad-te chuan, February 24, Inrinni khan nilengin Phunchawng leh Rangvamualah Joint Operation an nei a, ramhnuaiah zu siam zawn chhuah beihpui an thlak. He hunah hian rakzu litre 185, zu bilh lai ṭin 5,100, zu siamna bel 38, scooty pakhat leh car pakhat an man a; mi pathum an man tel bawk.

Chapchar Kût
Champhai District Chapchar Kût Celebration Committee chu nimin khan DC conference hall-ah an ṭhukhawm a, Kût hmannaa senso tur sorkarin Rs. 2,00,000-ah a tihpun avangin, vehbur khawn tura an lo rel tawh chu khawn loh mai ni se, an ti. Kûtah hian Mizo zia lang tam thei ang bera inthuam turin mipui an ngen a ni.

Ruihhlo tih phal lo
Aizawl Electric Veng Branch YMA chuan thuchhuah siamin, an veng thlanmualah ruih theih thil tih an remtih loh thu an tarlang a, "Electric Veng thlanmualah ruihhlo ti tawh lo turin mi tin kan ngen a, enthlak zui zel tum a ni," an ti. Electric Veng YMA hruaitute chuan February 25, Pathianni tlai khan an veng thlanmual chu an enfiah a, ualau taka zu in mi 30 vel an hmu a, chu'ng zinga ṭhenkhat chu an man a, ṭhenkhat erawh chu an tlanchhe hman a ni.

Guest house hawng
Mizoram Police Subordinate Officers Association (MPSOA)-in CID Complex, Bungkawna guest house leh chowkidar quarters an sak thar chu nimin khan IGP Zorammawia'n a hawng. Guest house leh chowkidar quarters hi MPSOA member-te'n pawisa an thawhkhawm hmanga sak a ni.

ODF sawiho
Lawngtlai District Water & Sanitation Committee (DWSC) chu nimin khan DC Dr. Arun T hoin DC conference hall-ah an ṭhukhawm a, inthiarna mumal nei lo awm lohna ODF atana Lawngtlai district puan a nih theih dan tur an sawiho a, zirna-in zawng zawnga inthiarna sak sak leh tui pek dan tur an sawiho.