Sorkar laipui scheme-a hnathawhte thlirho

Mamit District Development Coordination & Monitoring Committee chu, nimin khan Rajya Sabha MP Ronald Sapa Tlau hoin DC conference hall-ah an ṭhu a; sorkar laipui scheme hnuaia hmasawnna hna thawh hrang hrangte an thlirho.

Ronald Sapa Tlau chuan, Mamit district chhunga sorkar hnathawkte chu inlungrualna ṭha tak neia hna thawk tur leh thing­tlanga kut hnathawktute ni tina eichawp zawngte'n hâwpkhawp an thar chhuah ngei theihna tura an pawimawhna hre thar leh turin a chah.

Meeting-a tarlan danin, Mamit district-ah hian MGNREGS hnuai­ah kum 2017-18 chhungin job card nei chhungkaw 20,707-te tan inhlawhna ni 48 siam tawh a ni a, PMKSY hnuaiah self help group 79 din a ni tawh.

Community Sanitary Complex (CSC) hnuaiah Darlak leh Dapchhuah khuaahte van­tlang inthiarna (CSC) sak a ni a, Mamit kaltlanga Bairabi to West Phaileng kawlphetha pek hna 132kv line hna buaipui mek niin, check survey tih mek a ni a; check servey zawh veleh electric bante hman theiha peih thuai tura beisei a ni.

DDUGJY hnuaiah kawlphetha la hmu lo khaw 12-te eng pek tura ruahmanna kalpui a ni a; chu'ng zinga khaw pali - Damdiai, Kolalian, New Eden leh Pajirungpara-te chu êng pek mai theih tura peih a ni tawh.

PMGSY kaltlangin Mamit to Phaizau kawng, km. 10.48 kawng sial hna thawh mek a ni a, group pangaah ṭhen niin, kawngpui sial hna chak taka kalpui mek a ni. West Phaileng to Damparengpui kawng km. 2.13 chu siam zawh tawh a ni.

Meeting-ah hian Mamit district-a MLA pahnih Lalrinmawia Ralte leh Lalrobiaka te pawh an tel.