NLUP vawkte thih chhan zirchiang

Animal Husbandry & Veterinary (AH&Vety) department chuan thuchhuah siamin, Serhmun, Mamit district-a NLUP hnuaia sem vawk note thih leh damloh chhan chu zir chian mek a nih thu an tarlang.

AH&Vety department tarlan danin, Serhmun khuaah hian NLUP hnuaiah vawk vulh thlangtu (beneficiary) 20 an awm a, vawktê 120 pek an ni. February 23, 2018 thleng khan vawktê 120 sem tawh zinga 42 a thi tawh a; vawk la dam 78 zingah damsam lo 20 a awm bawk.

Vawk dawngtute harsatna tawh chu a hmunah endik turin February 23, 2018 khan Mamita AH&Vety hotute'n Rapid Response Team an tir a, vawk damlote chu uluk taka enfiahin a ṭul ang angin enkawlna pek nghal a ni. Vawk damlote chu an dam chhoh zel beiseiawm niin an sawi a, enkawl zui zelna tur damdawi pawh a vulhtute pek nghal an ni.

Vawk thite leh damlote chu khawsik, kawṭhalo leh thâwk lama harsatna neite a ni tlangpui a, natna thlentu chu eng nge a nih zir chianna atan thisen sample-te lak nghal a ni.