MCAB Chairman-in LADC hotute a kâwm

Mizoram Cooperative Apex Bank (MCAB) chairman T Lalmuanpuii chuan, nimin khan Lai Autonomous District Council (LADC) chief executive member (CEM) T Zakunga leh LADC hotute CEM pisaah a kâwm a, LADC chhunga MCAB hmalak theihna tur a sawipui.

T Lalmuanpuii chuan, Apex Bank hnathawh dan leh hmalakna tlangpui a sawifiah a, ram hmasawn nan inpuibâwm tawn tura thawh hona (cooperative movement) chu hmanraw ṭha ber nia a hriat thu sawiin, "Thingtlang khaw tinah mahni thawh chhuah ngei hmanga khawtlang ṭanrualna leh hmasawnna atan hman theih a ni," a ti a; MCAB Lawngtlai Branch chu thawktu dah belh leh chak zawka loan pe chhuak thei tura tihchangtlun an tum thu a sawi.

LADC huam chhunga bank awm lohna thing­tlang khaw tam takin harsatna an tawh ṭhin leh sorkar hmalaknaah pawh harsatna awm ṭhinte sawiho a ni a; LADC hotute chuan, MCAB lamin mipuite harsatna sutkian nan branch hawn leh PACS din dante ngaihtuahpui se an duh thu an sawi a ni.