Nikum aiin kumin January-ah thubuai a pung : Ruihhlo donaah NGO-te thawhpui a ṭul - DIG

Nimin khan Aizawl SP conference hall-ah Mizoram Police hotute chuan DIG (SR&NR) Joseph Lalchhuana hoin crime review meeting an nei a, nikum January aiin kumin January-ah thubuai ziah luh a pun thu leh ruihhlo do kawngah NGO-te nena thawhho zel a ṭul thu tarlan a ni.

Joseph Lalchhuana chuan Mizoramah ruihhloin ṭhalaite nunah harsatna a thlen nasat thu sawiin, "Ṭhalaite nun tibuaitu ruihhlo hi zu piah lamah heroin leh ruihhlo dangte an ni. Ruihhlo tawlhtute'n an paltlang ram kan nih avangin heng thil hi kan tuar nasa em em a ni," a ti.

DIG chuan ruihhlo do hna hi Law Enforce­ment Agency-te'n theihtawp chhuahin tihrem tum mah se, tihrem tak tak theih a nih loh thu sawiin, "Ruihhlo dona kawnga hmalatu dang YMA, VDP leh pawldange nena hmalakna ṭha tak siam zel hi kan tihmakmawh a ni," a ti a, SP tinte chu an district huam chhungah tha thlah loa tlawmngaipawlte nena theihtawp chhuah zel turin a chah.

Ram a changkang ang zelin sualna pawh a pun chho zel thu sawiin Joseph Lalchhuana chuan, "Tun hma kan hriat ngai loh mihring hmanga sumdawnna hialin min chim chho ta a, tun hnaiah kan ram chhunga Myanmar Rakhine state aṭanga lokal Rohingya pahnih man an ni a, anmahni ṭawngka aṭanga hriat danin duhthlanna pawh ni loin mirhing hmanga sumdawnna beitute'n an thlem chhuah niin a lang," a ti.

Joseph Lalchhuana chuan retheihna avanga sum hmanga thlemna leh bumna an tawk chu pawi a tih thu sawiin, "Chuvangin kan ram mipuite pawh hetiang laka kan him theihna atan tun aṭanga fimkhur tura inzirtir leh inkawhhmuh a ṭul," a ti.

Kuminah Mizoram hmun ṭhenkhatah kangmei avanga chhiatna in leh lo chan engemawzat an awm tawh tih sawiin DIG chuan, "Kangmei chhuak hi vanduaina hrim hrim bakah fimkhur tawk loh avanga thil thleng pawh a ni thei. Ṭhal a in ṭan dawn chauh avangin mipuite kan fimkhur hle a ngai," a ti a, kangmei chhuak tur laka fimkhurna lamah inzirtir luat a awm theih loh thu a sawi.

Meeting-a tarlan a nih danin, nikum January chhung khan thubuai IPC 161 leh Non IPC 33 a vaiin ziah thubuai 188 ziah luh a ni a, kumin January chhung chuan IPC 169 leh Non IPC 33 a vaiin thubuai 202 ziah luh a ni. Nikum aiin kumin January-ah thubuai ziahluh 14 in a tam.

Hetihlai hian kum 2016 aiin kum 2017 ah chuan thubuai ziah luh a tlem zawk a, kum 2016 khan thubuai 2837 ziah luh niin, kum 2017 ah chuan thubuai 2707 ziah luh a ni. Kum 2016 aiin 2017 thubuai ziahluh hi 130-in a tlem a, hei hi 4.58% a ni.