KHAWTHLIR

Chief Secretary pension tur thlah
Vawiina pension-a chhuak tur chief secretary Lalmalsawma chu Thawhṭanni khan Federation of Mizoram Govt. Employees & Workers (FMGE&W) chuan a pisa-ah an thlah. CS chuan sorkar hnathawkte chu ṭha viau mah se, hmasawnna tur an la neih thu sawiin, "Chungte chu - neitu tak tak rilru pu chunga hnathawh leh hnaah kan rilru tun aia tam zawk pek a ni," a ti. Lalmalsawma hi November 1, 2014 aṭang khan Chief Secretary a ni ṭan a, department pali - Finance, Personnel and Administrative Reforms, Political & Cabinet leh Vigilance a enkawl mek a ni.

Building hawng
Cheng nuai 179.70 senga New Serchhipa Fire Station Building sak thar chu nimin khan MLA Lt. Col. ZS Zuala'n a hawng a, kangmei ven thuah mitinin mawhphurhna an neih thu sawiin, "Tu emaw fimkhur loh avanga khawtlanga chhiatna thleng ṭhinah a bul tumtu man chhuaha hremna pek ngei ṭhin a ṭha hle," a ti. Serchhip Fire Station hi ni 17.4.1998 khan din ṭan a ni a, tun dinhmunah hian officer incharge pakhat, driver pathum leh firemen paruk an awm.

PAMRA-in kawm
PAMRA hruaitute chu nimin khan ZNP pisa-ah an leng a, an president Lalduhoma an kawm. PAMRA chuan sorkar lo awm tawhte bum ṭhan an nih thu an sawi a, ZNP bikin PAMRA leh martar chhungte tana hmalak an tum dan an zawhna chhangin, ZNP President chuan hma laksak thei dinhmuna an ding a nih chuan an chanvo leh mamawhte an hmuh ngei theihna tura theihtawpa hma laksak a tum thu a lo hrilh a ni.

Flower show
Horticulture department. leh Mizoram Florists' Association ṭangkawp chuan nimin khan Assembly Annexe building-ah Chapchar Kut Flower Show cum Fair an buatsaih a, March 2 thleng a awh ang. Fair-ah dawr 64 hawn a ni a, pangpar, leiṭha leh pot lei theih a ni.