Champhai College building CM-in hawng

Cheng nuai 951.29 senga sak Govt. Champhai College building pasarih chu nimin khan chief minister Lal Thanhawla'n a hawng. Building sakna atan hian Ministry of DoNER-in 90% leh state sorkarin 10% a tum.

Chief Minister chuan college chu zirlaite chher hriamna leh an hmalam hun buatsaihna a nih angin zirna leh thiamna kawngah bak college campus chu hman a rem lo tih sawiin, "Mizoram chhunga zirtirtute, college zirtirtute tiamin politics ruihchilh leh college-a politics hnuklutte chu Mizoram sorkarin a thunun hreh dawn lo a ni," a ti.

College building thar Mizoram hmun hrang hrangah sak chhoh mek a nih thu sawiin CM Hawla chuan, "College hmunhma ṭha tak tak nei mekte intlansiakna tur chu hmunhma tha neih inhman ṭangkaisiak, ram leh hnam tana mi pawimawh leh mihlawhtling incherchhuah tam siakte a ni ang," a ti a, state ṭhang mekin hmasawnna kawnga ke a pennaah ṭhahnem ngai ber tura beisei deuh bikte chu college zirlaite an nih thu a sawi.Sorkarin quality education buatsaih tura ṭan a lak mek laia a tum ber chu export quality ṭhalai mithiam tam thei ang ber chher chhuah a nih thu sawiin Lal Thanhawla chuan, "Infiamna khawvelah kan ṭhangduanga a lawmawm hle. Hriselna leh zirna lamah nasa zawkin

ṭan kan la leh mek a ni. Heng kan hmalaknaah te hian mipui thlawpna leh sorkar hnathawkte inpekna avangin hma kan sawn hle," a ti.

Khualzahawm bialtu MLA TT Zothansanga chuan college chu mipuitling chher­chhuahna hmun a nih thu sawiin, "College

ṭhat leh ṭhat loh tehfung ber chu mihlawhtling leh chhawrtlak chherchhuah tam lamah a ni," a ti a, an district chuan sorkar fawng chelhtu tam zawk hrual chhuak thei tura ṭan lak an ngaih thu a sawi.

Chief Minister-in buil­ding a hawn takte hi sq.m 1229.60 a lian multipurpose hall, sq.m 831.67 a lian arts & commerce building, sq.m 831.67 a lian science & BCA building, sq.m 800.05 a lian administrative & library building, sq.m 674.86 a lian boys hostel, sqm 100.30 a lian guest house leh sqm 61 a lian staff quarter-te an ni.