Mahni hamthatna aiin sorkar tan Thahnemngaih a pawimawh - Thanzara
MCS probationers (2017 Batch) Foundation Course training zote chu nimin khan ATI-ah thlah an ni a, an hun hmanpuitu IPR minister Lal Thanzara chuan sorkar hnathawkte chuan mahni hamṭhatna aia sorkar tana ṭhahnemngaih a pawimawh thu a sawi.
Lal Thanzara chuan MCS officer-te chu sorkar tan leh mipui tana hna an thawhna kawngah mahni in vawn, rinawm, an thawhpuite mai bakah mipui leh anmahni dawrtu laka rilru dik put leh an thawhsaka te tana thahnemngaih a pawimawhzia hrilhin, "Hna thiam, thawh chak leh taimak a pawimawh a, chung zawng zawng chungah chuan sum leh pai chung changa rinawmna te, mahni hnaa rinawmna te, mahni mimal hamṭhatna aia sorkar tana ṭhahnemngaihna te a pawimawh ber zawk a ni," a ti.
IPR Minister chuan sorkar hna chu tlawmngaih thila thawh tur a nih loh thu sawiin, "MCS-te chu sorkar khalhkaltu leh khalhkal theitu an ni a, nakin thleng pawha ram tana chhinchhiahtlak thawh theihna hmunah an awm dawn," a ti a, an service chhungin ram tana chhawrnahawm tur rotling hnutchhiah ngei turin a chah.
Inkhawmah hian ATI director Dr. Ankita Chakravarty chuan inlawmna thu sawiin, course co-ordinator Angela Zothanpuii'n training report pe in, trainee-te aiawhte Neng Thianlala leh Lalrinsanga Hnamte-in thu an sawi.
MCS Probationer 2017 batch-te hi hmeichhia pahnih leh mipa paruk an vaiin pariat an ni a, training-a ti ṭha ber best probationer atan Neng Thianlala thlan a ni. An training hian kum khat chhung awhin March 1, 2017 khan bul an ṭan a, hmun hrang hrangah attachment-te neiin an training chhung hian Guwahati, Bengaluru, Mysore, Kanyakumari, Chennai, Rajasthan leh Delhi te an tlawh a ni.