Kolasib-ah Legal Service Camp

Mizoram State Legal Service Authority (MSLA) chuan nimin khan Diakkawn YMA Hall, Kolasibah Legal Service Camp an buatsaih a, Kolasib Sub. Hqrs. YMA president C Liankunga'n a hman pui.

C Liankunga chuan sorkar hruaitute leh ram hruaitute chu mipui vanga awm an ni tih hriatchian a pawimawh thu sawiin, "Kan ram dante kan hriat a, zawm hi mipuite tih tur a ni. Mitinin kan dikna chanvo kan hmuh theina atan te, sorkar programme hrang hrang a nih ang taka mipuiin kan chhawr theihna atan mipuiin kan tih tur kan tihve a ṭul," a ti.

Legal services camp-ah Mizoram State Legal Services Authority member secretary Vanlalenmawia chuan mipuite lawmna thu sawiin, kalkhawmte chu legal services camp hi hlawk taka hmang tur­in duhsakna a hlan a ni.

Inkhawm hi Kolasib District Legal Service Authority secretary Sylvie Zomuanpuii'n kaihruai­in, KL Liana, MJS leh advocate H Lalṭanpuiate chuan mipuite tana dan hriat tur pawimawh hrang hrangte an sawi a ni.