ASF zangnadawmna central-ah dil mek : August-October ah vawk suat vek tum

African Swine Fever (ASF) léng avanga vawk suat neitute hnena zangna­dawmna pek tur Mizoram sorkarin sorkar laipuiah a dil mek. Hetih lai hian, kumin August-October chhungin vawk suat ngai la awmte suat vek tum a ni.

ASF nodal officer Dr Lalhmingthanga, AH & Vety joint director (Livestock Health) chuan Vanglaini palai zawhna chhangin, ASF vanga vawk suat leh vawk thi neitute'n zangnadawmna an dawn theih nan hma an lâk mek thu a sawi a, "July 31, 2021 thlenga vawk suat kan chhinchhiahte tan Ministry of Fisheries, Animal Husbandry and Dairying-ah zangnadawmna dilna kan thehlut. July 31 hnu lama suatte pawh kan chhinchhiah zel a, sorkar laipuiah report kan la thehlut rih lo," a ti.

Dr Lalhmingthanga chuan, "Kumin July 31 thleng khan vawk 5,977 kan suat tawh. Tunah hian suat ngai 48,939 vel a la awm angin kan chhût," a ti a, ASF vanga vawk suat ngaite chu August-October, 2021 chhungin suat vek an tum thu a sawi.

Sorkar laipui rate anga vawk suat tur la awmte suatna senso leh zangnadawmna pek tura pawisa ngai zat an chhût a, a tlem berah cheng vbc. 58.2 vel a ngaih dawn thu sawiin Lalhmingthanga chuan, "Sorkar laipui leh Mizoram sorkarin a zatve (50:50)-a intum sem tura tih a ni. Tunah hian kan Vety minister leh department hotute'n sorkar laipui an dawr mek a, zangnadawmna tur sorkar laipui leh Mizoram sorkarin 50:50 an intum sem tur chu 90:10-a min tihsak turin sorkar laipui sawipui an tum," a ti.

ASF vanga vawk thi neitute'n State Disaster Response Fund (SDRF) aṭanga chhawmdawlna an hmuh theih nan Disaster Management & Rehabilitation depart­ment-ah dilna an thehluh tawh thu sawiin Dr Lal­hmingthanga chuan, "DMR minister pawhin a pawm tawh a, tunah hian cabinet approval kan la nghak mek a, pawm a nih chuan ASF hi calamity-ah puan a ni ang," a ti a; ASF vanga vawk thi neitute'n SDRF aṭangin chhawmdawlna an dawn theih an beisei tih a sawi.

AH&Vety Joint Director chuan, Mizoramah ASF léngin ziaawm lam a pan ṭan tawha an hriat thu sawiin, "Champhai leh Siaha district-ah tun hnai hian a darh thar leh a, district dangah erawh chuan hri a darh nasa tawh lo," a ti. Selesiha College of Veterinary Sciences & Animal Hus­ban­dry laboratory chu ASF diagnosis ti thei tura phalna pe turin sorkar laipuiah dilna an thehluh thu leh chhanna an la hmuh loh thu a sawi bawk.