Lengpui Airport chei la zo hnai lo

Mizoram sorkarin Lengpui Airport chei ṭhat hna a thawh mek chu an la zo dawn hnai lo. Vanglaini-in a hriat theih chinah, airport chei ṭhatna atan hian cheng vbc. 73 ruahman a ni.

Vanglaini palai zawhna chhangin GAD (Civil Aviation) principal consultant Wg.Cdr. J Lalhmingliana chuan, Lengpui Aiport chei ṭhat hna chu zawh a la nih dawn loh deuh thu a sawi a, "Covid-19 avangin thawktu lamah harsatna a awm. Ṭhenkhat an haw a, rawn kal an awmin quarantine phawtte an ngai ṭhin. Hei hian hnathawh a tichak thei lo. Ramri buai avanga economic blockade laite khan bungrua eng emaw zat a táng a ni," a ti.

Wg.Cdr. J Lalhming­liana sawi danin, Lengpui Airport chei ṭhat a nih avangin thlawhtheihna ṭum leh thlawh chhuahah chuan harsatna a awm phah lo.

Mizoram sorkar chuan nikum lam aṭang khan Lengpui Airport chei ṭhat hna kawng hrang hrangin a thawk a, airport chei ṭhatna atan hian cheng vbc. 73 ruahman a ni.

Vanglaini-in docu­ment a neiha a lan danin, Lengpui Airport chei ṭhat hna hi hlawm (phase) thumah ṭhen a ni. Phase khatnaah chuan hna chi hrang hrang 13 a awm a, chuta tan chuan cheng vbc. 30.41 ruahman a ni. Phase hnihnaah hna chi hrang hrang paruk thawhna atan cheng vbc. 19.59 ruahman a ni thung.

Phase thumnaah chuan thlawhtheihna ṭumhmun (runway sur­face) tihchhah leh tihmâm te, thlawhtheihna parking area (apron) zauh hna leh thil dangte a tel a, hna thawhna atan cheng vbc. 23 ruahman a ni.