Mi 115-ah Delta variant hmuh belh

National Institute of Biomedical Genomics (NIBMG), Kalyani, West Bengal-a Mizoram aṭanga swab sample 151 thawn zinga 115-ah Covid-19 hri thar Delta variant (B.1.617.2) hmuh a ni.

Covid-19 thupuangtu Dr Pachuau Lalmalsawma chuan, swab sample NIBMG-a thawnte chu Aizawl district-a mi vek a nih thu tarlangin, "Zirchianna neih tawh chinah Aizawl, Lunglei, Kolasib leh Serchhip district-ah Covid-19 hrik thar a awm ngei tih finfiah a ni tawh," a ti a; Zoram Medical College-a Microbiology department chuan Aizawl, Lunglei, Kolasib, Champhai leh Serchhip district aṭanga sample 500 lakkhawmte chu whole genome sequencing tih turin NIBMG-a thawn tumin an buatsaih leh mek thu a tarlang.

Tun hnaia ni 27 chhungin Aizawl district-a khua/veng 67-ah swab sample endik rûnpui neih a nih thu sawiin Dr Pachuau Lalmalsawma chuan, "Sample 91,286 test zingah Covid-19 positive mi 2,591 hmuh chhuah a ni a, 2.83% a ni," a ti a; sample endik rûnpui chu kalpui chhunzawm zel a nih thu a sawi.

Dr Pachuau Lalmalsawma chuan, sorkar hmalakna hlawhtlinna an hmu ṭan tih sawiin, "Positive thar an tlahniam tial tial. Amaherawhchu, kan ziaawm ta hle tihna a ni lo a, kan la fimkhur chhunzawm zel a pawimawh," a ti. Covid-19 thawh thumna thleng tur nia sawi lakah inven fimkhur a ṭul thu sawiin, "A rawn thleng a nih pawha kan tawrh nat lutuk loh nan tih tur leh tih loh turte kan zawm ṭhat a pawimawh a ni," a ti bawk.

Covid-19 Spokeperson tarlante
1) Covid-19 inkai chhâwn chak dan leh hri veite'n an tawrh nat sâwt dan enin, district tinah Delta variant a awma ngaih theih a ni.
2) Whole genome sequencing turin March 2021-ah sample 69 thawn a ni a, variant thar hmuh a ni lo.
3) April 2021-ah sample 217 thawn a ni a, mi pali-ah Delta variant hmuh a ni.
4) June 2021-ah sample 100 thawn a ni a, mi 73-ah Delta variant hmuh a nih bakah, Alpha leh Eta variant mi pakhat ve veah hmuh a ni.
5) July 15, 2021-a sample 151 thawn zinga mi 115-ah Delta variant hmuh a ni.