Serchhipah 'chiahpuam tenau' hmuchhuak : Mi 50 chuangin cheng nuai 500 vel an dah

Jenny Malsawmthangi w/o Vanlalvena, Serchhip Dinthar Veng chuan mi pawisa la khawmin, bank aia a pung sang zawka pe thei nia insawiin sum dah puhna a kalpui a; cheng nuai 500 vel a tichingpen a, mi 50 chuangin pawisa an dah hman a ni.

Serchhip SP thuchhuahin a tarlan danin, Jenny Malsawmthangi hian kum 2017 vel aṭangin sum peipunna a kalpui tawh a, thla hnih leh a chanve chhungin sum dahte chu 15% vela pungin a pe chhuak leh ṭhin a ni. Mi 50 chuangte pawisa hmuh let tur belhkhawm chu cheng nuai 500 vel a tling.

Kumin May thla vel aṭang khan Jenny Malsawmthangi chuan mi sum dah leh a pung a pek chhuah turte a pe chhuak kim thei lo ṭan a; pawisa dah luh (capital) pawh an lak chhuah kim theih tak loh avangin pawisa dahtute chu mangangin an buai ta a ni.

Sum dahtute lungawi lo chuan August 19, Ningani zan dar 7 vel khan Jenny dawr, PC Store-a a thil zawrh ṭhenkhatte chu leiba aiah an laksak a, chumi avang chuan police-te'n an buaipui zui ta a, mi ṭhahnem takin pawisa ṭhahnem tak an dah tih an chhui chhuak tawh.

Serchhip police hotute hnen aṭanga Vanglaini thu dawn danin, Jenny Malsawmthangi te nupa hi nizan khan Serchhip Police Station-ah an riak a, police-in thil awm dan hi an chhui chiang mek a ni.

Serchhip SP chuan, an hmalakna ngaichang tur leh fimkhur taka awm turin mipui an ngen a; sum leh pai ît vangin dan kalha pawisa tihpunnaah pawisa dah lo turin mi tin a ngen bawk.