Partial lockdown pawhsei leh a ni : Hripui vei awm lohnaah inkhawm phal

Mizoram sorkar chuan Aizawl Municipal Corporation huam chhunga August 8, 2021 aṭanga Partial Lockdown a puan chu a vawi hnihna atan chawlhkar hnih dang a pawtsei leh a, September 4, 2021 zan dar 12 thleng a awh dawn. AMC páwn lam khua, Covid-19 vei mek awm lohnaah biak-ina inkhawm phal a ni a; Aizawlah lirthei tlân thei zat a pung dawn.

Partial Lockdown pawhsei belh leh hi kumin August 22 aṭanga September 4 inkara hman tur a ni a, nimin khan Standard Operating Procedure tihchhuah a ni. Sorkar chuan, "Covid-19 darh zel tur vên nan leh sorkar hmalaknate khaihlak loa tluang taka a kal zel theih nan State Executive Committee, SDMA chuan inkhuahkhirhna tlema tidanglamin eng emaw chen la kalpui chhunzawm ṭha a ti," a ti. AMC páwn lamah chuan DC-te'n an dinhmun azirin inkaihhruaina an siam ang.

Partial lockdown SOP thar hi August 8-21, 2021 chhunga SOP nen a inang tlangpui a, thil ṭhenkhat erawh tihdanglam a ni. Covid-19 vei mek awm lohna khuaah DC leh village task force ruahmannain biak-ina kohhran inkhawm phal a ni a; sikul leh anganwadi-te pawh hawn phal zui zel a ni.

Aizawlah inkhelh phal niin, in chhung (indoor)-ah mi 10 aia tam lo leh páwn lam (outdoor)-ah mi 25 aia tam loa inkhelh phal a ni a, gym-te pawh vawi khata awm thei zat bithliahin hawn phal a ni bawk a; hengahte hian Covid-19 symptom neite erawh tel phal a ni lo. Mizoram pumah kohhran rorel inkhawmpui (bial inkhawmpui) pawh chhun lamah tel thei chin bithliahin phal a ni bawk.

Aizawl khawpuiah dawrte chu hawn hun bithliah chhunzawm a ni a, lirthei intlân chhâwk zel tur a nih rualin, ni khata tlan thei zat tihpun a ni.

Taxi-te chu SOP hmasaah ni khatah sticker group pakhat chauh tlân phal a nih laiin, SOP tharah chuan sticker group pahnih zel tlân phal a ni tawh dawn a; two wheeler taxi pawh ni khatah sticker group pathum zel an tlân thei tawh dawn. Sumdawnna lirthei dang, bungrua phur chi (LMV)-te chu registration number kawpkim (even) leh kawpkim lo (odd)-in an intlàn chhâwk tawh dawn bawk.

(SOP-a mite tarlan vek a ni lo)
A. AMC CHHUNGA INKAIHHRUAINA
1. Partial lockdown chhungin loh theih loh thilah lo chuan páwna chhuah leh inlènpawh khap a ni a, building khata in hrang hrang luahte pawh intlawhpawh phal a ni lo.
2. Zan lamah curfew puan tur a ni ang.
3. Zirna-inte hawn phal a ni lo.
4. Kohhran inkhawm pangngai phal a ni lo a, zing leh tlai ṭawngṭai inkhawm erawh phal a ni.
5. Kohhran rorel inkhawmpui (bial inkhawmpui) chhun lamah phal a ni. Biak-ina lêng zat zatve (50% seating capacity) emaw, mi 200 aia tam lo tel phal a ni a, Covid-19 symptom neite tel loh tur a ni. Inkhawmpui thlengtu kohhranin task force-te nen SOP Implementation Committee an din ang. Zai phal a ni lo a, ruai buatsaih phal a ni lo.
6. Inneih inkhawm leh mitthi vuinaah mi 30 aia tam tel loh tur.
7. Inkhelh leh gym hawn phal a nih laiin, picnic spot, public park, ect hawn phal a ni lo.
8. Inkhelh hi indoor-ah mi 10 aia tam lo leh outdoor-ah mi 25 aia tam loa phal a ni a, Covid-19 symptom nei tel loh tur.
9. Gym-ah vawi khata awm thei zat aṭanga 33% aia tam awm phal a ni lo a, hmanruate phuh fai (sanitise) zel tur a ni a; hrûkpuan, tui, shaker leh mamawh dangte mahnia inken tur a nih bakah, Covid vaccine dose khat tal la tawh chauh kal phal a ni.
10. Dawr hrang hrang hawn dan SOP hmasa nen a inang tlangpui. Bazar leh dawrte group A, B leh C-a ṭhente chu zing dar 5 aṭanga tlai dar 5:30 thleng hawn theih a ni.
11. Thlai, thei leh sa zawrh ni pangngaia hralh zawh hman lohte chu LTF ruahmannain a tûk zingah dar 9 thleng zawrh zui phal a ni.
12. Mizoram sorkar pisaah group A leh B staff-te vai kal tur a ni a, group C leh D-te kal dan tur chu HoD/HoO-ten an ruahman ang.
13. Lirtheite intlân chhawk zel tur.

B. AMC PAWN LAM
1. DC-te'n an district-a Covid-19 léng dinhmun azirin inkaihhruaina an siam ang.
2. Covid-19 vei mek awm lohna khuaah DC leh VTF ruahmannain sikul leh anganwadi an kal thei a, a kaihhnawih department-in inkaihhruaina an siam ang.
3. Covid-19 vei mek awm lohna khuaah DC leh VTF ruahmannain inkhawm theih a ni.
4. Kohhran rorel inkhawmpui (bial inkhawmpui) chhun lamah neih phal a ni a, biak-ina leng zat zatve (50%) emaw, mi 200 aia tam lo tel phal a ni. Covid-19 symptom neite erawh chu tel loh tur. Inkhawmpui thlengtu kohhranin task force-te nen SOP Implementation Committee an din ang. Zai phal a ni lo a, ruai buatsaih phal a ni lo.

C. MIZORAM PUMA HMAN TUR
1. Covid-19 vaccine la la lote chu sorkarin a thlawna vaccine lakna a ruatah a hma thei ang bera la tura ngen leh beisei an ni.
2. Ṭul bikah zin veivah phal a ni a, mimal lirthei leh passenger phur lirthei hman phal a ni. Lirthei registration-a seating capacity tarlan aia tam chuan phal a ni lo.

D. INKHUAHKHIRHNA DANG
1. State pawn aṭanga Mizorama lutte chu an luhna point of entry-ah uluk taka screening tih tur a ni a, a ṭul dan azirin RAT hmanga swab sample endik a ni ang. Inruahman lâwk theih nan mPASS-flight emaw mPASS-road hmanga inhriattir hmasak tur a ni. Home quarantine leh hotel quarantine dil duh tan online-in https://mcovid19.mizoram.gov.i... dil theih a ni.
2. State pawn aṭanga rawn lut/haw tur tan VTF/LTF hriatpuina lehkha lâk kher a ngai lo a, an khua/veng an thlen hmain an veng/khua LTF/VTF-ah inhriattir lâwk tur a ni thung.
3. State pawn aṭanga hawte inkhung hran chungchangah HFW department-in inkaihhruaina an siam anga kalpui tur a ni.