Vairengtein ramri vanga state pahnih indo reng a rang lama chinfel an duh
Vairengte Joint VC leh an khuaa páwl hrang hrang hruaitute tun hnaia Bangla Veng YMA Hall-a ṭhukhawm chuan, ramri avanga state ṭhenawm indo reng chu a rang lama chinfel an duh.
Vairengte Joint VC leh NGO-te chuan, "Ramri buai chungchangah Mizoram sorkar leh Assam sorkar a rang lamin inbe thuai se. Ramri avanga state ṭhenawm kan indo reng hi a rang lama chingfel thuai tura nawr ni se ṭha kan ti. Vairengte khawtlang hruaitu VC pali leh NGO president ṭheuhte August 23, 2021 hian sorkar hotute hmu tura kal ni se," an ti.
Assam police-in Mizoram aṭanga Assam lama lirthei chhukthlate ruihhlo kaihhnawihah an dap ṭhin avangin Vairengte khawtlang chuan Assam-a lut tur lirtheite chu an him ngei a ni tih hriatpuina Mizoram Police emaw, Excise & Narcotic department aṭangin clearance certificate pek chhuahtir an duh.
Vairengte khawtlang chuan, Lailapur khuaa sumdawngte dàwr lo tur leh hlawhfaah pawh chhawr loh ni se an tih avanga Lailapur khawtlang hruaitute'n inbiak an duh thu an thlen avangin inbiakpui ṭha an ti. Inbiak hun atan nimin kha ruahman ni mah se, harsatna eng emaw avangin inbiak a ni lo a, naktuk Pathianni-ah inbiak an tum.
Mizoram leh Assam-in ramria buaina an neih chungchangah ramri depa awm khua - Vairengte, Buarchep leh Saihapui-V khuate sorkarin a vil zuina leh a uapnaah te, an beisei phak loh khawtlang tana hmasawnna tur tam tak a thawhnaahte leh Mizoram chhung leh páwna awm mimal, pawl, kohhran tam takin thilpek sum leh pai leh ṭawngṭaina an dawnahte Vairengte chuan lawmthu an sawi a ni.