Covid-19 vangin mi 2 thih belh
Nimin khan Mizoramah Covid-19 vei enkawl lai mi pahnih an thi. Sorkar chhinchhiah angin, nimin tlai dar 5 thleng khan hripui vangin mi 192 an thi tawh.
Nisungi (83) w/o Rev. B Hainuaia, Lawngtlai Vengpui chu nimin zing dar 6:30 khan hripui vangin Lawngtlai District Hospital (dedicated covid health centre)-ah a thi a, nimin vek khan vui a ni. Covid-19 positive a ni tih August 4, 2021 khan hmuh chhuah a ni a, August 6 aṭangin Lawngtlai DCHC-ah enkawl a ni.
Nimin zing vek dar 7:22 khan Santi Rabidas (78), Chanmari West chu hripui vangin State Referral Hospi-tal (ZMC)-ah a thi a; Covid-19 positive a ni tih August 14 khan hmuh chhuah niin, SRH-ah enkawl nghal a nih thu sorkar thuchhuakin a tarlang.
Chanmari West Branch YMA hruaitute hnen aṭanga thu dawn danin, Santi Rabidas hi Silchar lam mi a ni a, Chanmari West-a a makpa te hnenah kum 3/4 vel kal ta aṭanga awm a ni. Hindu ni mah se, in hal a rem loh avangin Kristian invui dana vui turin YMA hnenah an ngena, Presbyterian Kohhranin an vui a, Chanmari West thlànmualah phùm a ni. Chanmari West YMA-in senso ngai hrang hrang an tumsak bawk.