KHAWTHLIR

Lalremsiami Group-A post pe
Tokyo Olympics 2020-a India aiawha hmeichhe hockey khela semi-final thleng thei Lalremsiami, Kolasib chu Mizoram sorkar chuan sorkar hna group-A post leh in hmun a pek thu chief minister Zoramthanga chuan Twitter kaltlangin a puang. Chief Minister tarlan danin, Lalremsiami hi Sports & Youth Services department-ah chief coach (hockey) hna pek a ni. Remsiami post hi kai sanna awm lo a nia thu dawn a ni.

Post siam belh
Mamit bawrhsap Dr Lalrozama chuan, Mizoram leh Assam ramri buaina avangin ramri hmun ṭhenkhata venhimna khauh zawka kalpui mek a nih thu leh ramri hmun ṭhenkhatah security post siam belh a nih thu a tarlang. Mamit DC chuan, "Heng hmuna duty-te'n an hna ṭha taka an hlen zel theih nan leh mipui kan him zawk theih nan ṭul bik eng emaw tak thil a nih loh chuan ramri leh venhimna hmun, a bikin Assam police duty-na hnaih hmunte mimal leh páwl anga tlawh loh tur a ni," a ti.

MRB branch 91-na
Mizoram Rural Bank (MRB) general manager Amal Chandra Sarkar chuan nimin khan Rajiv Nagar-ah MRB branch thar a hawng a, MRB branch 91-na a ni. MRB hi September 27, 1983-ah Regional Rural Bank Act (1976) hmanga din a ni.

Thisen pe
Lawngtlaia ṬKP Salem Unit chuan nimin khan Lawngtlai District Hospital tan thisen unit 16 an pe a, petute mipa 12 leh hmeichhia pali an ni.

Ṭanpuina pe
Mizoram Police Driver Welfare (MPDW) chuan nimin khan ramria police duty-te'n a ṭul apianga an hman atan Rs. 35,000, TNT, Muanna Veng hnenah Rs. 40,000 leh MPOSA building sak mek ṭanpui nan Rs. 15,000 an pe a; an member-te thawh khawm a ni. Secretariat Service Driver's Association chuan an pawl ruby jubilee pualin nimin khan Phaisen leh Zophaia police duty-te hnenah ei tur ṭhahnem tak an pe bawk.