ASF vangin vawk 24,088 thi tawh

Vawk pùl hri, African Swine Fever (ASF) avangin nimin thleng khan Mizoramah vawk 24,088 a thi tawh a, khua/veng 233-ah a lêng tih finfiah a ni tawh. ASF vang hian nimin thleng khan vawk 9,116 suat (culled) a ni tawh bawk.

Animal Husbandry & Veterinary department-in report an dawn chinah, ASF vanga Mizorama vawk 24,088 a thih tawh laiin, ASF lènna (infected area)-ahte vawk dam lai 47,059 a la awm a; March 21, 2021 aṭanga nimin thleng khan ASF infected area-a puan loh khua/veng 101-ah chhan hriat loha vawk thi 887 a awm tawh.

Aizawl district chu ASF infected area leh ASF vanga vawk thi tamna ber a la ni zel a, Mizoram puma infected area azinga 45.92% chu Aizawl district-a mi a nih bakah, nimin thlenga Mizorama ASF vanga vawk thi zawng zawng zinga 42.82% chu Aizawl district-a mi a ni.

AH&Vety department hriatpuinain ASF infected area 233 zinga 100-ah vawk 9,116 suat a ni tawh a, ASF infected area páwn lam khua/veng 13-ah vawk 298 suat a ni tawh. ASF vanga vawk suatte chu AH&Vety department chuan an chhinchhiah vek a ni.

Chhan hriat loha vawk leh sanghal thi a awm chuan phone number 8731975444 leh 8974027269-ah hriattir zel turin AH&Vety department chuan mipui an ngen.