Mipui tawrhna belhchhah lo turin ZPM ṭhalaiin PE Minister an ngen

ZPM ṭhalaite chuan thuchhuah siamin, Power & Electricity minister R Lalzirliana chu hripui léng kara mipui tawrhna belhchhah zawnga ṭawngkam hmang tawh lo turin an ngen.

ZPM Ṭhalai chuan, hripui léngin Zoram pum a tuam lai leh sum thawh chhuah a harsat lai taka electric bill chuan mipui a barakhaih tih sawiin, electric bill sang lutuk vanga complaint thehlut mi tam tak an awm thu an sawi a, "PE Minister-in mipui rilru thawi damna lam sawi loa electric bill sang complaint-tute leh khawtlanga mi hnawksak, âr rûk chíng leh zu zuarte nena a khaikhin zawk hi mipui zah lohna lian takah kan ngai. Sorkar thil tih dik loh tuartu an nih angin zah taka an harsatna chinfelpui zawk turin kan ngen a ni," an ti.

Electric bill nasa taka pung tam tak chu sorkar inthlahdah vang a nih thu sawiin ZPM ṭhalaite chuan, "Tun chinah chuan mipui phurrit siam belh lo thei ang bera fimkhur lehzuala electric bill siam a nih theih nan hma la turin PE minister Pu R Lalzirliana kan ngen a ni," an ti bawk.