P&E minister Zira'n mipui a hmusit - Cong Thalai

Congress party ṭha­laite chuan thuchhuah siamin, Power & Electricity minister R Lalzirliana chu harsatna a siamsak mipuite hmusit zui tawh lo turin an chah.

MPYCC chuan, electric bill nasa taka a pun avanga mipui mangang au chhuak leh complaint-tute chungchang R Lalzirliana'n a sawi duh dan chu a Mizo loa an ngaih thu leh harsatna a siamsak mipuite a hmusit hlea an ngaih thu an sawi a, "Electric bill siamtu lamin an tih fel tâwk loh vang ni ngeiin a lang. Bill complaint-tute chu minister R Lalzirliana hian 'ár rû, drugs ngawlvei leh zu zuar mi hnawk' angin cable TV-in an kawmnaah a sawi chhuak a ni," an ti.

Minister R Lalzirliana chu harsatna nasa tak tâwk mek mipui aiawha ding tur a nih zawk thu sawiin MPYCC chuan, "Mipui harsatna sutkian tum aia electric bill sang tak pe tura nawr lui ang hiala a sawiseltute a diriam hi pawi kan ti a, an thlavâng a hauh tur leh an aiawha a din chhan mipui laka a inluling ta lutuk hi a vanduaithlak kan ti a ni," an ti. Electric bill chungchanga mipui harsatna sukiang turin sorkar an phût nawn tih an sawi bawk.