Hailakandi DC-in Zophaiah Police tirh tawh loh a tiam
Hailakandi DC chuan nimin khan Kolasib DC Dr H Lalthlangliana chu telephone hmangin a bia a, Kolasib DC duh dan angin Zophai, Bairabia Mizoramin lei an dawhna hmunah police tirh tawh loh a tiam. Bairabi Zophai lui, Assam lam hnaihah Mizoramin lei an dawh mek chu August 20, Zirtawpni khan Assam police-te'n kal chilhin, lei dawh hna chawlhsan tura an hriattir bakah, iron rod eng emaw zat an chhuhsak a ni.
Thu dawn danin, Assam lam hnaih Zophaia lui kânna turin Mizoramin lei an dawh mek a, lei awm sa ṭha tawh lo thlakna tur a ni. Lei dawh mek chu August 20, 2021 khan Assam police eng emaw zatin tlawhin, lei dawh hna thawktute chu hna chawlhsan turin an hriattir a, iron rod eng emaw zat an laksak bawk a ni. August 21, Inrinni khan lei chu Mizoram police venna hnuaiah dawh chhunzawm a ni a, harsatna awm loin hna an thawk.
Hailakandi DC chuan Kolasib DC hnenah Zophaia lei dawh mek chu chawlhsan tur leh a bul hnaia police-te hnûk kîr turin a ngen a, "Kan police he lai hmuna rawn kal turte pawh ka dang a ni. Chuvangin, nangni pawh he lai hmunah hian awm tawh bik lo ula," a ti.
Kolasib DC Dr H Lalthlangliana chuan, Assam police-te'n lei dawhna tur iron rod an lak chu dah kîrtir tur leh Zophaiah police-te kaltir tawh lo turin a lo phût lêt a; Hailakandi DC chuan Kolasib DC duh dan chu tihhlawhtlin a intiam a, iron rod pawh rawn dah lêttir a tum a ni. He thu ziah lai thleng chuan iron rod chu an la dahkir lo thung.
Hailakandi DC-in lei dawh hna titawp tura a ngen chungchangah Kolasib DC chuan, Buarchep, Saihapui-V hmuna Assam sorkarin lei an dawh mek tihtawp a nih loh chuan lei dawh hna an chhunzawm zel tur thuin a chhang a; Hailakandi DC chuan a thuneihna páwn lam a nih avangin Cachar DC a lo sawipui tur thu a sawi a ni.
Vanglaini palai zawhna chhangin Dr H Lalthlangliana chuan, "Buarchep lama lei an dawh chhung chuan Zophaiah lei dawh chhunzawm ve zel kan tum. Lei dawhna bul lawkah hian kan police-te an awm a, keini tan chuan lei bula police dah hi hnuh kir pawh a ni ve chiah lo. Lei dawh mekte véng pha rengin an awm a ni," a ti.
Thu dawn danin, August 20-a Assam police-te'n Mizoram sorkarin lei a dawhna tur hmanrua an lak chungchangah hian Bairabi MZP chuan FIR an thehlut a ni.