KHAWTHLIR

Vaccine dose 8,78,055 pe tawh
August 21, Inrinni thleng khan Mizoramah Covid-19 vaccine dose 8,78,055 pek a ni tawh. Covid vaccine hi mi 6,50,952-in dose khatna an la tawh a, chu'ng zinga mi 2,27,103 chuan dose hnihna nen an la kim tawh a ni. August 21 bikah chuan vaccine dose khatna 15 leh dose hnihna 128, a vaiin dose 143 pek a ni.

Tanpuina hlân
Minister of state MLA Lalruatkima chuan nimin khan Aizawl West Joint YMA Field Multipurpose Hall-ah a bial, Aizawl West-II chhung - Tuikual South, Tuikual North, Dinthar, Dawrpui Vengthar, Vaivakawn leh Kanan local task force-te hnenah oxygen concentrator pahnih leh Rs. 50,000 ṭheuh a hlàn. Oxygen concentrator hi India Formosa Foundation aṭanga dawn a ni.

Thisen pe
Inrinni khan Adventist Youth Federation, Aizawl West chuan Aizawl Civil Hospital blood bank-ah thisen unit 71 an pe a, petute mipa 52 leh hmeichhia 19 an ni. KṬP, Nursery Bial pawhin Khatla South Vengthar kohhran hall-ah thisen pek huaihawtin, Civil Hospital tan mipa 53 leh hmeichhia pasarihte'n unit 60 an pe a; blood bank-ah mimala a thlawna pe mi 11 an awm bawk. Inrinni vêk khan Lunglei Rahsi Veng Bial PYD-te chuan Lunglei Civil Hospital-ah thisen unit 38 an pe a, petute mipa 35 leh hmeichhia pathum an ni. Lawngtlaia ṬKP - Salem Unit leh Thingkah Unit-te pawhin Lawngtlai District Hospital-ah thisen unit 44 an pe a; Salem unit aṭangin mi 16 leh Thingkah unit aṭangin mi 28-in an pe a ni.

BCM-in budget khûm
Mizoram Baptist Kohhran chuan kum 2020-21 chhunga an budget chu Rs. 1,79,89,927-in an khûm. BCM Financial Report-a a lan danin, kum 2020-21 chhunga BCM budget chu Rs. 69,35,70,000 a ni a, an sum hmuh zawng zawng chu Rs. 71,15,59,927 niin, budget an khumna chu Rs. 1,79,89,927 a ni.