Serchhipa chiahpuam kaihhnawihah Sum dahtu hriat belh zel a ni

Bank aia pung sang zawka pe thei nia insawia mi pawisa la khawm ṭhin Jenny Malsawmtluangi w/o Vanlalvena, Serchhip Dinthar Veng hnena sum dah nia insawi an pun belh zel. Thil thleng hi Serchhip police-te'n an chhui zui mek.

Jenny Malsawmtluangi hnena sum dahtu harsatna tâwk hriat belh zel an ni a, an zingah hian Serchhip khawpui chhunga mite bakah, Keiṭum, Lunglei, Lawngtlai leh Aizawl lama mite pawh an tel nia thu dawn a ni. Harsatna tawh vanga Serchhip Police Station pantute chu police-te'n thu zawtfiahin, a theih angin hma an la chhunzawm mek a ni.

Sum peipunna kal­puitu Jenny Malsawm­tluangi dawr pahnih leh kudam pathum, Serchhip Tuikhuah Venga mite chu Serchhip police-te'n mipui tlawh theih loh turin an kharsak tawh a, August 21, Inrinni khan dawr leh kudama bungruate chu enfiaha chhinchhiah vek niin, chumi hnuah kalh leh nghal a ni.

Serchhip police-te chuan, sum peipunna kalpuitu ber nia hriat Jenny Malsawmtluangi bank account chu khawih chêt theih lohin an dahtir tawh a, an car leh scooter pawh an hréng tawh.

August 20, 2021-a Serchhip SP thuchhuahin a tarlan danin, Jenny Malsawmtluangi hian kum 2017 vel aṭangin sum peipunna a kalpui tawh a, thla hnih leh a chanve chhungin sum dahte chu 15% vela pungin a pe chhuak leh ṭhin. Tun dinhmuna mi 50 chuangte sum hmuh let tur belhkhawm chu cheng nuai 500 vel a tling.

Kumin May thla vel aṭang khan Jenny Mal­sawmtluangi chuan mi sum dah leh a pung a pek chhuah turte a pe chhuak kim thei lo ṭan a; pawisa dah luh (capital) pawh an lak chhuah kim theih tâk loh avangin pawisa dahtute chu mangangin an buai ta a ni.