MW 24 pe chhuak thei tur Tuirini SHP MNF sorkarin a thawk duh lo - MPCC

Mizoram Pradesh Congress Committee (MPCC) hruaitute chuan Inrinni khan Aizawl Press Club-ah thuthar thehdarhtute an kâwm a; Congress sorkar laia an tihfel deuh vek tawh Tuirini Small Hydel Project (SHP), megawatt 24 pe chhuak thei tur chu thawk duh loa hnâwlah MNF sorkar an puh.

MPCC general secre­tary Joseph Lalhimpuia chuan, Tuirini SHP chu siam ni ta se, kawlphetha a siam chhuah zawng zawng chu Mizoram ta tur a nih avangin nasa takin kawlphethaah Mizoram a intodelh phah tur thu a sawi a, "RTI Act hmanga zawhna chhannaa a lan danin, he project atana senso tur pawh December 4, 4019 khan BRICS New Development Bank Board of Director meeting, Shanghai-a neih chuan a pawm a ni," a ti.

Joseph Lalhimpuia chuan, "Hei pawh hi MNF sorkar chuan an hnâwl a ni. Project hi Chief Minister-in a pawm duh tlat lo," a ti a; Power & Electricity department lamin pawm tura ṭum eng emaw zat an ngen pawhin CM-in a pawm duh lo niin a sawi.

Joseph Lalhimpuia sawi danin, Tuirini SHP atana BRICS remtih dan chu Mizoram tan a ṭha hle. Project pumpui chu cheng vbc. 465 sênna tur a ni a, 80% chu BRICS-in kum khata 1.25%-a punga a pek tur niin, 20% chu state sorkar tum tur a ni. Loan rulh hun pawh Mizoram tana ṭha tura ruahman niin, Tuirini SHP hawn (commission) aṭanga rulh tur a ni.

Mizoram tihhmasawnna kawnga pawimawh kawlphetha siam chhuahna remchang Mizoramin a nei leh ang em tih ngaihtuah tham a nih thu sawiin Lalhimpuia chuan, "MNF sorkar hmasain megawatt 60 pe chhuak thei tur Tuirial HEP compensation vanga a hluihlâwn ang mai hian Tuirini SHP pawh a hluihlâwn mai a hlauhawm hle a ni," a ti.

Joseph Lalhimpuia chuan, Turini SHP chu Congress sorkar laia bul ṭan, sorkar laipuiin a pawm thlap a nih thu sawiin, "He project hnâwl a nih chhan dik tak hi Mizoram mipui hriatah zêp loa puan kan phût a ni," a ti a; MNF sorkarin Congress sorkar hmalakna an chhunzawm duh loh vanga hnâwl nia an rin thu a sawi.

MPCC Media chairman Dr Lallianchhunga chuan, kumin July - August electric bill chu a hma thla thum chhunga bill chawkrualin, meter en loin rin thuin sorkarin bill a siam tih sawiin, "Bill hi rin thua siam a nih avangin a dik lo nasa hle. Dawr, office, in tam tak power supply hmang mang loa a neitute'n an kalsan rihte pawhin bill sang tak an dawng a ni," a ti.

Dr Lallianchhunga chuan, inkhàrkhip vanga ei leh bara harsatna nasa tak tâwk mek mipui phurrit nasa taka sorkarin a siam belh thu sawiin, "Hei hi electric bill tihpun nghawng pakhat ni mah se, sorkarin mipui harsatna hre duh loa thutlukna a siam vangah kan ngai," a ti a; electric bill san chungchanga sorkar chhuanlam siam chu mipui tan pawm theih a nih loh thu a sawi.

June 24, 2021 khan MLA Lalrindika Ralte-in Chief Minister hnenah Covid-19 vanga ramin harsatna a tawh chhung chu electric bill leh tui bill-ah mipui ngaihnathiamna nei tura a ngen thu sawiin Lallianchhunga chuan, "CYMA kaihhruaia all party leh NGO meeting pawhin BPL leh AAY-te bill hrang hrangah ngaihnathiam an duh. Ngennate hi sorkarin a runluih zawk emaw tih tur a ni," a ti.

MPCC Media Chairman chuan, cable TV-in an kawmnaah Power & Electricity minister R Lalzirliana'n, electric bill sang vanga lungawi lo mipuite chu ar rûk ching, drugs ngawlvei leh a rûka zu zuarte nen a tehkhin tih sawiin, "Mipui tham lohna dik tak niin kan hria a, ram hruaitu sawi àwmah kan ngai lo. Electric bill complaint-tute hi an sual vang a ni lo a, an dikna chanvo humhim an duh vang a ni," a ti bawk.