Covid-19 vangin mi 196 thi tawh

August 21, Inrinni zan khan Covid-19 vei enkawl lai mi pahnih an thi a, nimin khan mi pahnih an thi leh bawk. Sorkar chhinchhiah angin, nimin tlai dar 5 thlenga hripui vei thi tawh zat chu mi 196 an ni.

Covid-19 vei enkawl lai Badrul Khanam (73) w/o Salim Khan, Lunglei chu Inrinni zan dar 8:50 khan State Referral Hospital (ZMC)-ah a thi a, hripui vanga thi 193-na a ni. Covid-19 vei a ni tih July 27, 2021 khan hmuh chhuah a ni a, August 4 aṭangin SRH-ZMC-ah enkawl ṭan a nih thu sorkar thuchhuakin a tarlang.

Lunglei aṭanga thu dawn danin, Bahrul Khanam hi Lunglei Venglaia dawrkai hmasa Sorab Uddin Khan-a fapa, Salim Khan a nupui niin, Lungleia awm nghet leh dawrkai lian leh hlun ber zinga mi an ni a; nimin zing khan vui niin, Lunglei Bazar Veng thlanmuala Sorab Uddin Khan-a thlànah phùm a ni.

Inrinni zan vêk dar 10:10 khan Lalngaihawma (61) h/o Lalremruati, Tuikual North chu hripui vangin SRH-ZMC-ah a thi a, nimin chhun khan Presbyterian Kohhran hall-ah vui a ni. Thu dawn danin, Lalngaihawma hi kal (kidney) ṭha lo leh zunthlum nei sa a ni a, Covid vaccine a la lo. Covid-19 positive a ni tih August 8, 2021 khan hmuh chhuah niin, August 15-ah SRH-ah dah luh a ni.

Nimin zing dar 5:40 khan hripui vei enkawl lai Lalhmasaa (65), Ṭinghmun, Aizawl district chu community covid care centre - Ṭinghmun Middle School-ah a thi. Covid-19 positive a ni tih August 20, 2021 khan hmuh chhuah niin, Ṭinghmun CCCC-ah dah luh nghal a ni a, hripui a vei tih hmuh a nih aṭanga ni hnihnaah a thi a ni.

Ṭinghmun aṭanga thu dawn danin, Lalhmasaa hi thisen sang nei sa a ni a, a thih hma lawk, nimin zingah pawh la tho harhin, mi dangte nen CCCC-a awmte in tur thingpui an lum a, thingpui lum zawhah a la hma avangin a mu leh a, a hnua kaihthawh an tumin an kai tho zo lo a ni. Ṭinghmun khuaah hian Covid-19 vei mek an tam avangin Lalhmasaa thlan tur chu Sakawrdai ṭhalaite'n an laihsak a, hmanrua zawng zawng pawh an intum vek a; nimin chawhnu dar 1 khan vui a ni.

Nimin chawhnu dar 2:45 khan Thangthluaii (83) w/o Hrangkapthanga, Zemabawk chu hripui vangin SRH-ah a thi a, hripui vanga thi 196-na a ni. Covid-19 positive a ni tih August 8 khan hmuh chhuah niin, August 11 khan SRH-ah dah luh a ni a; nimin tlai dar 6 khan kohhran hall-ah vui a ni. Amah hi Covid vaccine la lo a nih thu an sawi.