COVID-19:Mizoram dinhmun : Hripui vei 1,221 hmuh belh a ni

Mizoramah Covid-19 vei August 20, Zirtawpni khan mi 645 leh August 21, Inrinni khan mi 576 hmuh chhuah a ni a, ni hnih chhungin mi 1,221 hmuh a ni. Inrinni leh nimin khan hripui vei dam tawh mi 1,799 an chhuak a, mi pali an thi.

Covid-19 vei August 20-a hmuh chhuahte chu mipa 316 leh hmeichhia 329 an ni a; ZMC laboratory-a hmuh 97, TrueNAT hmanga hmuh 44, RAT hmanga hmuh 502 leh Fluorescent Immunoassay (FIA) hmanga hmuh pahnih an ni. August 21-a hmuh chhuahte chu mipa 292 leh hmeichhia 284 an ni a; ZMC-a hmuh 175, TrueNAT hmanga hmuh 34, RAT hmanga hmuh 366 leh FIA hmanga hmuh pahnih an ni.

IDSP record angin, Mizoramah Covid-19 vei 52,180 hmuh chhuah a ni tawh a, mipa 26,982 leh hmeichhia 25,198 an ni. Nimin tlai dar 5 thleng khan mi 46,167 (88.48%) chhuahtir an ni tawh a, mi 196 (0.37%) thi tawhin, enkawl mek mi 5,817 (11.15%) an awm.

August 20, Zirtawpnia sample endik dan chu - ZMC laboratory-ah Aizawl district-a mi 1,023, TrueNAT hmangin district pakuaah 273, RAT hmangin district 11-ah 5,446 leh FIA hmangin Aizawlah pahnih a ni a, a vaiin sample 6,744 a ni. Sample endik aṭanga hripui vei hmuh chhuah 645 chu 9.56% a ni a; ZMC-ah 29.48%, TrueNAT-ah 16.11%, RAT-ah 9.21% leh FIA-ah 100% a ni.

District hrang hranga hripui vei hmuh chhuah dan chu - Aizawlah mi 391, Kolasib-ah 76, Lawngtlaiah 59, Mamitah 54, Lungleiah 19, Hnahthialah 16, Siahaah 13, Serchhipah pariat, Champhaiah pasarih leh Saitualah pahnih a ni. 

Zirtawpnia hripui vei hmuh chhuah mi 645-te chu symptom nei 347 leh nei lo 298 an ni a; tualchhunga kái 642 leh tun hnaia state páwn aṭanga rawn lut pathum niin, tualchhunga kái zingah kàina chin hriat loh mi 375 an awm.

Nausen kum khat tling lo pali an awm a, a naupang ber ni nga mi a nih laiin, a upa ber chu kum 88 a ni thung. August 21, Inrinnia sample endik dan chu - ZMC laboratory-ah Aizawl district-a mi 982, TrueNAT hmangin district pakuaah 362, RAT hmangin district 11-ah 8,296 leh FIA hmangin Aizawlah panga a ni a, a vaiin sample 9,645 a ni. Sample endik aṭanga hripui vei hmuh chhuah 576 chu 5.97% a ni a; ZMC-ah 17.82%, TrueNAT-ah 9.39%, RAT-ah 4.41% leh FIA-ah 20% a ni.

Inrinnia district hrang hranga hripui vei hmuh chhuah dan chu - Aizawlah mi 300, Kolasib-ah 71, Mamitah 57, Siahaah 40, Lawngtlaiah 39, Lungleiah 26, Champhaiah 19, Hnahthialah 17, Saitualah paruk leh Serchhipah pakhat an ni.

Mi 576-te chu symptom nei 271 leh nei lo 305 an ni a; tualchhunga kái 569 leh tun hnaia state páwn aṭanga rawn lut pasarih niin, tualchhunga kái zingah kàina chin hriat loh mi 219 an awm. Nausen kum khat tling lo 12 an awm a, an zingah symptom nei an awm nual.

August thlaa ni 21 chhungin Mizoramah Covid-19 vei mi 13,256 hmuh chhuah a ni tawh a, chawhrualin ni tin mi 631.24 hmuh chhuah an awm ang a ni. Mizorama Covid-19 vei hmuh tawh zat 52,180 chu kum 2011 chhiarpui angin, Mizorama mi 1,000 zelah hripui vei mi 47 an awm ang a ni.

Nimin khan tlai dar 5 thlengin hripui laka fihlim tawh mi 749 chhuahtir an ni a; Inrinni khan mi 1,050 chhuahtir an lo ni tawh bawk.