Lungleiah Fit India Freedom Run

Nehru Yuva Kendra Sangathan (NYKS)-in India Independence Day vawi 75-na puala ‘Azadi Ka Amrit Mahotsav’ hnuaia programme hrang hrang a kalpui mekah August 21, Inrinni khan Lunglei district-a hmun hrang hrangah Fit India Freedom Run 2.0 neih a ni a, bawrhsap Kulothungan A-in a hmanpui.

Kulothungan A chuan, taksa insawizawi leh hrisel tura ṭan lâk a ṭul thu sawiin, "Taksa hriselin rilru hrisel a siam a, hlawhtlinna tinréngin a ûm zui ṭhin," a ti a; ṭhalaite chu hriselna kawng zawh turin theihtawp chhuah tur leh taksa insawizawi ngai pawimawh tlat turin a chah.

Azadi Ka Amrit Mahotsav hnuaia Fit India Freedom Run hi August 13 aṭanga October 2, 2021 chhunga hman tur a ni a, India ram chhung hmun hrang hranga district 744 tuam chhuak tura ruahman a ni. Freedom Run-ah hian taksa hriselna enkawl chungchang leh khua leh tuite inpumkhatna chungchanga infuihna, thutiam sawihona leh cultural activity dangte neih a ni.