Ṭinghmun leh Pukzing khuaah Covid-19 vei mek an tam

Mizoram hmâr lama khaw pakhat, Ṭinghmun khuaah nimin khan Covid-19 vei mek mi 120 chuang an awm a, nimin vek khan Covid-19 vanga thi mi pakhat an nei. Khaw lian lo zinga mi, Pûkzíng, Mamit district-ah hripui vei mek mi 70 chuang an awm bawk.

Ṭinghmun khuaah hian August 20, Zirtawpni khan Covid-19 vei mi 23 hmuh chhuah niin, nimin khan mi 71 hmuh chhuah leh a ni a, ni hnih chhunga hmuh chhuah hi mi 94 an ni. A hmaa hmuh chhuah tawhte nen hripui vei mi 127 an awm mek tih khawtlang hruaitute chuan an sawi.

Khawtlang hruaitute sawi danin, Ṭinghmun khuaah hian mi 1,400 vel an cheng mek a, Covid-19 vei mek mi 127 chu khaw mipui (1,400 anga chhutin) aṭangin 9.07% a tling. Hripui vei mek zingah ṭhalai an tam ber a, naupang pawh eng emaw zat an awm a ni.

Sorkar thuchhuaha a lan danin, Pûkzing khuaah August 20 khan Covid-19 positive mi 42 hmuh chhuah a ni a, a tuk Inrinni khan mi 28 hmuh chhuah leh a ni bawk a, ni hnih chhunga hmuh chhuah zat hi mi 70 an ni.

Pûkzing khawtlang hruaitute sawi danin, an khuaah hian in 120 vel awmin, mi 500 vel an chêng a; Covid-19 vei mek zat chu mihring cheng zawng zawng aṭangin 14% a tling. Hripui vei zinga a tam ber chu CCCC - Pukpui High School-ah enkawl an ni a, kum 80-90 vel mi panga vel chu inah enkawl an ni thung. Ṭhenkhat chu nimin khan Mamit lamah hruai an ni bawk.

Khawtlang hruaitute chuan, Pûkzíng khuaa Covid-19 vei mek zinga a tam zawk chu tun hnaia Marpara-a bank an dawrna aṭanga kái leh an kaihhnawihte an nih thu an sawi rualin, Aizawl aṭanga hawte aṭanga kai nia rin eng emaw zat an awm thu an sawi.