Mizo ṭhalaite India ram pawn thlenga Hnathawh tir kan tum - MYC Chairman

Mizoram Youth Commission (MYC) chairman Joseph Lalhimpuia chuan, MYC thil tum chu Mizo ṭhalaite state chhung mai ni lo India ram pawn thlenga hna thawhtir theih a nih thu a sawi.

Joseph Lalhimpuia hian nimin khan a pisa-ah thuthar thehdarhtute kawmin, Mizo ṭhalaite'n Mizoram chhung ringawta thil an zir a, Mizoram chhung ringawta hnathawh tur an zawn chu ṭha an tih loh thu sawiin, "State pawn thleng mai ni lo, ram pawn thlenga ṭhalai lehkha zirtir leh hnathawh tir hi kan tum a ni. Chumi tur chuan hma kan la dawn a ni," a ti.

MYC chairman lo ni tawhte hmalakna avangin ṭhalaite tan kawng tam tak sial a nih tawh thu sawiin Joseph Lalhimpuia chuan, "Ṭhalaite hian hma sawn zel se kan duh a ni. Kan thupui chu 'Mizoram ṭhalaite tana khawvel thar zauh sak' tih a ni," a ti a, an budget-in a daih loh a, dil belh ngai khawpin ṭhalaite hlawhtling se an duh thu a sawi.

MYC Chairman chuan South India lamah chuan sikul ṭha tehna atan board exam result hman a nih tawh loh thu sawiin, "An sikul aṭangin mi engzat nge IIT, JEE leh NEET aṭanga inziak tling awm tihte hi sikul ṭha tehna atan an hmang a ni. Kan education system pawh hi tihdanglam ve a ngai ang em tih ngaihtuahna a awm," a ti.

Joseph Lalhimpuia chuan north zone tan Aizawlah leh south zone tan Lungleiah IIT-JEE leh NEET coaching class hawn tum a nih thu sawiin, "Alternative Learning System, New Delhi nen online coaching class atan kan thawk ho a ni," a ti a, IIT-JEE leh NEET coaching atan hian kumin bikah chuan Aizawlah mi 50 leh Lungleiah mi 30 tan class kalpui tum a nih thu a sawi.

MYC Chairman sawi danin, coaching class atan hian MYC-in 75% tumin, zirlaite'n 25% an tum a ngai ang. Zirlaite hi an inziak tling a nih chuan an sum tum hi pekkir leh an ni ang. Kuminah chuan exam a hnaih tawh avangin offline coaching class-a kal mekte online coaching nena tikawp tura thlan tur a ni.

Nakkum aṭang chuan IIT-JEE & NEET coaching hi kum hnih atan offline coaching-a kalpui a ni dawn a, class XI zirlaite thlan an ni dawn a, Aizawl centre atan mi 100 leh Lunglei centre atan mi 60 thlan an ni ang.

Aizawlah chuan zirlai 80% chu tualchhung technical training institute-te nen thawkhoin thlan an ni dawn a, 20% chu Govt. HSS zirlai aṭanga thlan tur niin, tualchhung technical training institute-ah coaching an kal ang. Lungleiah chuan Lunglei khawpui chhunga lecturer-te'n coaching class hi an kalpui dawn a ni.