Vawiinah Chapchar Kut

Vawiin aṭang hian Mizote kut ngaihhlut ber Chapchar Kut lawm a ni dawn a; a lawmna pui ber Aizawlah chuan a ni khatnaah Lammualah Art & Culture minister R Romawia hoa hman a ni dawn. Chief minister Lal Thanhawla chuan Zohnahthlakte Chapchar Kut chibai a buk.

Chief Minister chuan Chapchar Kut chu Zohnathlakte tan kut ropui tak a nih thu sawiin, "Tun hmain kan lo hmang uar hle ṭhin a, tun hnu deuhahte pawh kan nu leh pa, kan pi leh pute pawhin Aizawl khawpuiah ngei pawh an hmang ṭhin a ni. Amaherawhchu, hun eng emaw ti aṭang khan Kristianna nen a inmil lo anga ngaihnate a awm avangin han chawlh lailawk ve rih a ni," a ti.

Ṭhangthar lo awm zelah mi tam takin kan culture te, kan tradition te leh kan nunphung ziarang hrim hrimte hi kan chawimawi leh kan chawi lar tur a ni tih rilru an put thu sawiin Lal Thanhawla chuan, "Chuvangin tun hnuah deuhah phei chuan Central YMA te kaihhruaiin Aizawl khawpui bakah district hrang hrangahte kan lo hmang leh ta a ni," a ti a, Chapchar Kut hman a ni leh ta chu thil lawmawm tak a nih thu a sawi.

Chief Minister chuan Chapchar Kut chu inremna kut a nih thu tarlangin, "Ṭhenawm khawveng innghirnghote inrem nan te, nu leh pa karah inhriatthiam lohna awm inhriatthiam leh nante leh khua leh khua te pawh inremna tur atan hman ṭhin a ni. He kut hi Zoram chhung leh Zohnathlak zawng zawngte'n inhriat­thiam nan leh in unauna tihtharna hunah kan hman theih chuan a lawmawm ngawt ang," a ti.

Kumin Chapchar Kut thupui atan 'Sem sem dam dam, ei bil thi thi' tih hman a ni a, naktuka Lammuala Chapchar Kut lawmnaah kut pa atan Myanmar-a Chin State Hakka chief minister U Salai Lianluai beisei a ni a, kut thlengtu chu chief minister Lal Thanhawla a ni ang.

Chapchar Kut pual hian flower show, food court, handloom & handi­crfat exhibition leh photo exhibition buatsaih a ni.