KHAWTHLIR
CS charge
Chief secretary Lalmalsawma pension-a a chhuah tak avangin Ministry of Home Affairs chuan order tichhuakin, addl. chief secretary leh Delhi Mizoram House resident commissioner ni mek Arvind Ray chuan midang ruat an nih hma chuan Chief Secretary hna hi a chelh dawn thu a tarlang.
MPS kaisang
PC Lalchhuanawma, MPS chu tun hnai khan senior administrative grade-ah a kaisang a, a kaisan avang hian 1st Bn. MAP Commandant aṭangin Fire & Emergency Service Director-ah sawn a ni.
HSLC exam tan
Mizoram Board of School Education (MBSE) hnuaia High School Leaving Certificate (HSLC) Board Examination, 2018 chu nimin aṭang khan ṭan a ni. MBSE aṭanga thudawn danin, HSLC examination-ah hian theory exam-in March 16 thleng a awm dawn a, March 19-21 thleng practical exam a ni ang. Kumin hian exam centre 112 ah zirlai 18,335-in exam an hmachhawn a ni.
Thisen pe
Kolasib DIET zirlaite chuan, nimin khan Kolasib District Hospital tan thisen unit 21 an pe a, thisen petute hi mipa 12 leh hmeichhe pakua an ni.
Handloom Expo
Ministry of Textiles bultumin nimin khan Kahrawt VC Hall, Champhaiah Special Handloom Expo 2018 buatsaih a ni a, addl. DC Lalsangpuii Hmar-in a hawng. Handloom Expo hian March 2 thleng a awh dawn a, stall 31 awmin Aizawl aṭangin 23, Thenzawl aṭangin panga leh Champhai aṭangin pathum hawn a ni.
MLA-in enfiah
Champhai North bialtu MLA TT Zothansanga chuan, nimin khan NEDP sum cheng nuai 14 hmanga siam mek TT Road, Champhai Vengsang aṭanga Champhai-Aizawl kawng pawhtu kawngpui leh BADP sum cheng nuai 17 hmanga sak mek Vengsang High School-te chu a hmunah kalin hnathawh dan a enfiah.