Department-te an inpawh a pawimawh - Lok Sabha MP

Serchhip District Development Co-ordination & Monitoring Committee (DDCMC/DISHA) chu Thawhlehni khan DC conference hall-ah an ṭhukhawm a, chairman Lok Sabha MP CL Ruala chuan hmasawnna hnathawh kawngah department-te an inpawh a pawimawh thu a sawi.

Lok Sabha MP chuan member-te chu thinlung thar nena nasa zawka mipui tana hnathawk tura insiamthar tura fuihin, sorkar kutke pawimawh; ramin hma a sawn theih nana a fawng chelhtu an nih zia hre turin a ngen a, "Co-ordination Committee a nih ang ngeiin department hrang hrang ten inpawhna ṭha tak nei chunga ram mipuite rawng an bawl ho a, an ṭanrual a pawimawh," a ti.

Meeting-a tarlan a nih danin, PMGSY sum hmanga PWD-in Serchhip district chhunga inkalpawhna kawng an thawh mek panga - Chhingchhip to Thentlang, Hmunṭha to Khawbel, Chhingchhip to Hualtu, Chhingchhip to Hmuntha leh E. Lungdar to Sailulakte chu tun financial year chhunga thawh zawh vek hman tura beisei a ni.

National Rural Drinking Water Programme hnuaiah PHE dept.-te'n tunah hian Lungkawlh WSS, Tuichang WSS leh Neihloh Rainwater Harvesting Scheme-te an kalpui mek a, Lungkawlh bik hi hna ṭan theih tura hmanruate phurh thlen tawh niin, Tuichangah tui a haw thei tawh a, Neihloh pawh chak taka thawh mek a ni.

National Social Assistance Programme kaltlangin Serchhip leh E. Lungdar ICDS Project hnuaiah tar pension mi 918, hmeithai pension mi 84 leh disabled pension mi 24 ten an dawng mek a, National Family Benefits Scheme hnuaiah tun hnaiah chhungkaw paruk ṭanpuina pek an ni.

National Health Missions hmalaknaah April, 2017 leh January, 2018 inkarah district chhungah naupiang mi 882 an awm a, heng zingah hian boral 12 awmin infant mortality rate chu 13.6% a ni a, nu nau chunga thi an awm lo.

Meeting-ah hian Serchhip district chhung­a MLA pahnih Lalrinawma leh Vanlalawmpuii Chawngthu te pawh an tel.