Zinmite hip thei turin Mizoram pholang chho mek - Tourism Minister

Reieka Convention Centre leh Tourist resort panna kawnga Isua lim chu, Thawhlehni khan Tourism minister John Rotluangliana'n a hawng a, an department-in Mizoram chu zinmite hip thei turin an pholan chhoh mek thu a sawi.

John Rotluangliana chuan Mizoram chu sik leh sa lamah hmun nuam tak a nih thu sawiin, "Tourism department-in kan ram hi ramdang hmaah nasa zawka zin mite hip thei turin a pho­lang chho mek. Zinmite hip thei tur leh Mizoram mipuite tan pawh a tlawh chakawm turin hmun hrang hrangah project a kalpui mek a ni. Hun reiloteah sky-walk leh rope-way te pawh kan neih thuaika beisei," a ti.

Reiek khua chu tourist hmun pawimawh tak anih avangin a khaw mipuite'n zinmite dawnsawnna kawngah rilru zau an put a ṭul thu sawiin Tourism Minister chuan, Reiek khaw chhunga Tourism department-in hma anlo lak tawhte chu neitu chan chang a, uluk taka a hmunhma enkawlpui kawngah khawtlang hruai­tute chu thawhpuiah a sawm a ni.

Bialtu MLA Lalrobiaka chuan Convention Centre hawn tak chhawr ṭangkai thei bertu chu a khaw mipuite an nih thu sawiin, "Duat tak leh uluk taka enkawl hi kan mawhphurhna ṭheuh a ni," a ti

Convention Centre sak nan hian cheng nuai 255.17 hman a ni a, a sakna tur sum hi Northern Eastern Council (90%) leh Mizoram sorkar (10%) in intum semin, October 2015 ah sak tan a ni a, February 2018 khan an sa zo a ni. Mi 250 leng tura sak niin motor 10 leh two-wheeler 20 lenna garage a awm a, stage leh green room te awmin solar street light 8 a awm bawk a ni.