Minister-in Legal Aid Clinic a hawng

Govt. T Romana College-ah nimin khan Higher & Technical Education (HTE) minister R Romawia'n Legal Aid Clinic a hawng. R Romawia chuan mi dikte hrem an nih lohna atana fimkhur a ṭul thu a sawi.

R Romawia chuan dan chu mi zawng zawng inlungrual leh him tlang taka kan awm khawm theih nana siam a nih thu sawiin, "Misual hremna dan siam niin, mipui himna tihchhiat a nih lohna turin dan bawhchhiate insiamṭhatna tur hmun jail siam a ni. Mi dikte misual hrema hrem an nih loh nan dan siamtute an fimkhur hle," a ti.

Diknain ro a rel theih nan mi rethei tak tak, ukil rawihna man nei lo te pawhin buaina an tawha a thlawna an tana din sak turin sorkarin ukil a rawih­sak ṭhin tih sawiin, T Romana College-a hawn thar Legal Aid Clinic chu college zirlaite tan mai bakah Republic Veng leh a chhehvela mipui mamawhtu apiang tan a ṭangkai a beisei thu a sawi.

Legal Aid Clinic hawn inkhawm hi Govt. T Romana College principal Dr. Lalrintluanga'n kai­hruaiin, zirlai leh zirtirtute bakah Republic Veng khawtlang hruaitute an tel.