National Science Day hmang

Nimin khan hmun dang rualin Mizoramah pawh hmun hrang hrangah National Science Day hman a ni a, Aizawlah chuan Assembly Annexe conference hall-ah State Planning Board vice chairman H Liansailova hoa hun hman a ni.

H Liansailova chuan science & technology pawimawhna hi zirlaite leh zir chhuak tawhten hre thar lehin, mi nawlpui pawhin kan hriat thar leh a ngaih thu sawiin, "Science & technology lama hma kan sawn a, kan thlen san ang zelin mihring nun pawh a changkang chho zel a ni a, hman thiam chu ram changkang tehna pakhat a ni," a ti.

Mihring thiamna leh finna a taka chantir tur chuan science & technology hman ṭang­kai a ngaih thu sawiin H Liansailova chuan, "Scientist leh mi thiam tak tak thil siam chhuah leh hmuh chhuah chuan mihringte khawsak phungah awlsamna a thlen bakah harsatna ni thei tur pawh a chhawk zangkhai phah a ni," a ti a, science lama hmasawnna chuan ram tan pawh hlawkna a thlen theih tur thu a sawi.

Inkhawm hi chief scientific officer Dr. RK Lallianthanga'n kaihruaiin, senior scientific officer Samuel Lalmalsawma chuan National Science Day hman a lo nih tawh ṭhin dan a sawi.

February 28, 1928-a India scientist Dr CV Raman-a’n ‘Raman Effect’ a hmuhchhuah hriat reng nan kum 1987 aṭang khan February 28 hi National Science Day-ah hman ṭhin a ni. Mizoramah chuan kum 2006 aṭang khan National Science Day hi hman ṭan a ni a, he ni pual hian exhibition, talk show, seminar, lectures, van sang lampang zirchhianna, debate, quiz competition leh exposure tour-te neih a lo ni tawh ṭhin a ni.