Kolkata-ah Magnetic Mizoram Roadshow
Nilaini zan khan Hyatt Regency Hotel, Kolkata-ah Magnetic Mizoram Roadshow buatsaih a ni. Chief minister Lal Thanhawla chuan Magnetic Mizoram CEO Summit cum Investors meet Aizawl-a April 20-21, 2018 a neih tum a nih thu leh chumi hunah chuan corporates leh investor-te Mizorama lo kal turin a sawm.
Chief Minister chuan Mizoram sorkarin NEDP hmangin chak taka ram hmasawnna atana hna a thawh thu sawiin, "Chumi tihlawhtling lehzual tura corporates aṭanga investment mamawhna a len avangin sector hrang hranga Mizoram potential neihte rawn zir chiang rawh u. Mizoram economy chak taka a ṭhan mek avang leh sorkar policy kalpui chhoh zel tur thlirin sector hrang hranga investment hlawk taka kalpui theih a nih ka ring," a ti.
Mizoram chu India ramah hmasawnna ṭhang chak ber zingah a lang thei chu lawmawm a tih thu sawiin Lal Thanhawla chuan, "Chak zawka hmasawnna kalpui zel tura Mizoram sorkar hnathawhna kawng hrang hranga corporate-te nen thawhdun a ṭul a ni," a ti a; corporate leader te, ram hrang hrang palai aiawhte leh investors kalkhawmte Mizoram hmasawnna atana thawhhopuiah a sawm.
Chief Minister chuan Mizoram chu state ralmuang ber zing a mi leh mipui tanrualna hmun a nih thu sawiin, "Investor tan kawng zau tak a inhawn theih a beisei awm a ni," a ti.
Thusawitu dang Planning minister Lalsawta chuan Mizoram sorkarin NEDP hmangin ram hmasawnna chak taka kalpui turin hma a lak mek thu sawiin, "Investor-te nena ṭan dun a theih chuan hmasawnna a chak leh zual ka beisei. Investor-te'n ṭanpui an ngaihna leh thawhdunna tura ruahman tul awm reng rengah sorkar a inhawng a, Mizoram dinhmun nasa taka chawikang turin private investment a pawimawh a ni," a ti.
Inkhawmah hian Planning secretary Dr. C Vanlalramsanga chuan Mizoram chanchin leh economy dinhmun tlangpui a lem nen a sawifiah a; Tourism director Biakthanmawia Pautu chuan tourism destination a siam tura hmalakna kawng hrang hrang leh private investor te pawimawhna a sawi a; Innovations India MD Capt Rahul Bali pawhin thu a sawi.
Roadshow-ah hian ram hrang hrang consul general, CEO leh MD, film maker, producer leh tour operator-te an tel.