NLUP auto-rickshaw sem theih hrih lo

NLUP hnuaia autorick­shaw sem ṭhin chu Gauhati High Court (GHC), Aizawl Bench-ah thubuai thehlut an awm avangin sem chhun­zawm theih a ni hrih lo.

NLUP Implementing Board (NIB) aṭanga Vanglaini palai thudawn danin, NLUP 1st phase-ah chuan autorickshaw trade thlangtute hi pawisa pek an ni a, anmahniin an lei a ni. 2nd phase aṭang chuan tender chhuahin, a supply tu tur thlan a ni a, company pakhat chiahin chhangin, anni hi supply tura thlan a ni.

Company thlan sate'n agreement anga an supply zawh tawh hnuah a thara tender chhuah leh a ni a, company pahnihin an chhang a ni. Company pakhat zawk chu sorkar thil tih danah an lungawi loh avangin GHC, Aizawl Bench-ah hian an zualko a ni.

Court chuan State Project Approval Board (SPAB) chu ṭhukhawm a, ruahmanna siam turin a ti a, mahse an ruahmanna siam hi kaltlangpui loa Court-a thehlut phawt turin sorkar a hriattir a ni. SPAB hi an ṭhukhawm tawh a, an ruahmanna siamte chu Court-ah thehluh a ni ang. Court-in thutlukna a siam hma chuan autorickshaw hi sem theih a ni hrih lo.

Tun dinhmunah hian NLUP hnuaia autorickshaw trade thlangtu mi 400 chuang vel dawng lo an la awm a ni.