KHAWTHLIR

Photo Exhibition
IPR dept. leh Mizo Photographers’ Society ṭangkawpin, Vanapa Hall-a Chapchar Kut puala Photo Exhibition an buatsaih chu nimin khan IPR secretary Biaktluanga'n a hawng a, exhibition hmang hian Chapchar Kut chhim tura ram pawn aṭanga lo kalte pawhin thlalak mawi tak tak kaltlangin Mizoram leh Mizote chanchin an hriat theih tur thu a sawi. Exhibition-ah hian thlalak 361 pho chhuah a ni.

Tlan khap
Traffic SP C Lalthanmawia chuan thupek chhuahin March 3-4 hian Vaivakawn, Hunthar peng tihzauh hna PWD-in an thawh dawn avangin hnathawh hun chhung nileng leh zanah lirthei tlan a khap. December 4 bikah chuan zing dar 9 leh 11 inkarah lirthei tlan theih tura hawn a ni ang.

Lirthei chesualah thi
Nimin zing dar 4 vel khan Selingah car pakhat a chesuala, K Lalhruai­tluanga (34) s/o K Lian­zuala, Chawngtlai chu ­a thi. Car-ah hian Chawng­tlai khaw mi vek mi pali an chuang a, KṬP general conference-a kal tur an ni a, pakhat chu a hliam na deuh a, pahnih chu an ngaihtuahawm lo nia thudawn a ni. Seling YMA chuan mitthi hi kuang an siam sak a, police-te'n aṭul ang an tih zawhah an khua panpui a ni.

CID SP
Home department chuan notification ti chhuakin, Diasater Management & Rehabilitation (DMR) dept.-a joint director (operation) hna chelh mektu Zosangliana, MPS chu a kaisan avangin SP CID (Crime) ah sawn a nih thu an tarlang.

Guwahati-ah interview
Mizoram Institute of Medical Education & Research (MIMER) a department/speciality 17 atana zirtirtu sang lam - professor (post 4), associate professor (post 17) leh assistant professor (post 18), a vaiin post 41, lakna tur atan Mizoram Public Service Commission (MPSC) chuan tun hnai khan Guwahati-ah interview an buatsaih. Heng post 41 atan hian ram chhung hmun hrang hrang aṭang­-in diltu 76 an awm.