Vanduaina avanga lei chim thin hi a pawi kan ti - PWD Minister Thanzara
PWD minister Lal Thanzara chuan vanduaina avang leh misualte avanga lei a chim ṭhin chu pawi a tih thu sawiin, MNF chuan vanduaina politics inchirhthehna atana hmangah a puh
Lal Thanzara hian Nilainia Hmunṭha khuaa Tuikum Congress Block I leh II in khawmpui an neih a hmanpuinaah thu sawiin, "Vanduai vang leh misualtu emaw ten lei dawh kilhna hmanrua an lo ruk ṭhin avanga lei chim palh ṭhin hi a pawi kan ti a, nunna chân palh an lo awm phei chu a vanduai thlak kan ti takzet. Chutih laia vanduaina thleng politics inchirhthehna hun remchanga lo la tute hian lei an la dawh ve miah lo a ni,” a ti.
Kawng chhia leh lei chhia ringawt buaipuiah MNF-te chu puhin PWD Minister chuan, "Nikum khan ruahtui a tlak tam em avangin hmalak chak theih a ni loa, hna ṭan theih a nih velah hma chak taka lain, Mizorama kawng chhe zual laite siam hna chak taka thawh a ni a. Tun atanga hun reilote chhungin Mizoram chuan inkalpawhna kawngpui tha tak kan nei tawh dawn," a ti a, kawng chhe chanchin sawi sawi ṭhin tute hian kawng ṭha chanchin hi min tlangaupui ve dawn em tih chu a zawhna nih thu a sawi.
Lal Thanzara chuan Congress party an sorkar leh dawn nia sawiin, "MNF party-te'n tu party mah term hnih sorkar an la awm ngai lo tih chang chawiin, an sorkar ve tawh tur thu ṭan chhan leh au hlaah an hmang a ni. Kan party chuan an innghahna hi a dik lo a ni tih fiahin term thum kan sorkar dawn a ni. Kan sorkarah sum leng vak a pung a, bank pawh nasa takin a pung a ni," a ti.
Health Minister ni bawk Lal Thanzara chuan Congress sorkar laia sorkar laipuiin Mizoram leh Meghalaya hnena hospital din nana cheng vbc. 40 ve ve a pek chu Meghalaya ten an vanneihpui tih sawiin, "MNF party chuan tihhlamzuih lamah hmawr an bawk ta hlauh zawk a ni. Referral Hospital changtlung tak kan neih ve tur chu party mite contract therhlo siam nan hmangin awmze nei loin an kalpui a, ar vulhna hmunah an chhuah thei ṭawk a ni," a ti a, Congress sorkar chuan medical college neih tumin hma a lak mek thu a sawi.