Bank-te hnathawh thlir let
Mamit District Consultative Committee (DCC)/ District Level Review Committee (DLRC) chu nimin khan DC Lalbiaksangi hoin DC conference hall-ah an ṭhukhawm a, an district chhunga bank-te hnathawh hrang hrang an thlirlet.
Bank tinte'n loan hrang hrang pek chhuah dan meeting-a an report aṭanga a lan danin, Mamit district chhunga SBI branch pathumten credit deposit (CD) ratio norms 60% ah 36.38% a ni. MRB bank parukte CD ratio chu 51.90% niin, Mizoram Cooperative Apex Bank-te CD ratio chu 86.88% a ni. Bank-te CD ratio hi tihsan a nih theih nan ṭan la sauh sauh turin committee chuan bank-te an ngen.
Pawisa fai kher loa indawr tawnna cheque system leh digitisation hman uar deuh deuh ni se meeting chuan an ti a, mipui loan diltute harsatna sutkian a nih theihna atan document submit bank official-te vanga tihkhaw tlaite chu awlsam thei ang bera chinfel sak ṭhin turin meeting an rel.
Meeting-ah hian district chhunga mipuite tan Financial Literacy Campaign a tam thei ang ber bank tinte hian khaw hrang hrangah neih ṭhin ni se, mipuiten loan awlsam taka an lak theihna turin zirtirna pek ṭhin ni se tih a ni bawk.