Chapchar Kut hlim taka hman a ni

Nimin khan Mizoram hmun hrang hrangah Mizote kut ngaihhlut ber Chapchar Kut hman a ni. Aizawlah chuan Lammualah hman niin, Kut Pa chu Home ministe R Lalzirliana niin, Kut Thlengtu chu Tourism minister John Rotluangliana a ni.

R Lalzirliana chuan Chapchar Kut thupui atana 'Sem sem dam dam, ei bil thi thi' tih hman a ni chuan he kut hi Mizo nun dan ṭha chhawm nun lehna atan hmang ila ti a buatsaihtute rilruah a awm tih a tilang chiang tih sawiin, "Kan hnam ṭhangzelah kan hnam zemawi kan changkang san a ni. Kan nunze mawite hi a dal telh telh em tih ngaihtuah nawn a ngai," a ti.

Hnam changkang apiangin mahni hnama chian pawimawhna an hriat thu sawiin Home Minister chuan, "Mahni hnama chian hi mi hawi harh leh fel apiangin an ngaihlu ṭhin. Hnam incheina inchei hi a ṭha a, uar zel tur. Mah se, kan chhungril lama hnama kan chian loh chuan awmzia a awm dawn lo," a ti a, mahni hnam chin dan aia hnam dang chin dan ngaisangte nun chu a chiri ṭhin thu a sawi.

R Lalzirliana chuan mite tana inphal chuan mite duhsakna an dawn ṭhin thu sawiin, "Mite tana inphalte chu mi rilruah an cham reng ṭhin. Mahni chauh in ngaihtuah ṭhin mihring chu miin an hre zui ngai lo. Mihring nun hlutna tehna ber chu midangte tan malsawmna kan nih leh nih loh hi a ni. Ram tana nun hlan ngam khawp te, ṭhiante chan avanga nun chan ngamte hi sem sem dam dam, ei bil thi thi tih nun chhuahpuitu an ni," a ti.

Home Minister chuan kan pi leh pute'n midangte duhsakna lantirna hun atana an hman ṭhin Chapchar Kut hi Mizote min tipumkhat lehtu atan hman ni se a duh thu a sawi.

Inlawmna thusawitu, Central YMA president Vanlalruata chuan, Chapchar Kut thupui chu, 'Sem sem dam dam, eibil thi thi' tih a nih angin kut chhimtute chu ṭhenawm khawveng leh midangte nena inlaichinna ṭha siam ṭan tum turin a chah a, "Mizote chu hmanlai aṭangin induhsakna lantir nan ṭhenawmte nen chawhmeh insuah tawn ṭhin an nih angin kut chhimtute chu chawhmeh insuah ching thar leh ang u. Retailler-in buhfai a sem chu a buk dik tak a nih theih nan leh gas hralh turte pawhin a buk dik tak chauh an hralh theih nana mahni hmazawn ṭheuhah ṭan i la ang u," a ti.

Chapchar Kut hmanaah hian hmanlai Mizo nun tilang thei tur thil hrang hrang entir a ni a, hnam lam chi hrang hrang en tur awmin, cheraw kanpuiah branch YMA 90 aṭangin bu 106 kan a ni. Chawhnu lamah zaithiamte'n zaiin mipui an awi a ni.

Aizawl bikah chuan Chapchar Kut hi Ningani leh nimin khan hman a ni a, kut hmang tur hian hmun hrang hrang aṭangin mi ṭhahnem tak an lo kal a ni.

Kut pual hian Assembly Annexe-ah flower exhibition, Vanapa Hall-ah photo & painting exhibition leh Lammualah handicraft/ handloom & food exhibition buatsaih a ni.