KṬP General Conference chhunzawm zel

KṬP General Conference vawi 57-na chu March 1, Ningani zana aṭanga West Phailenga neih chu chhunzawm zel a ni. KṬP-ah hian member 1,47,665 an awm mek.

KṬP General Conference-ah hian a ṭan zanah palai lawmna inkhawm neih a ni a, Synod moderator Rev. F. Lalrinnunga'n thuchah a sawi.

Moderator chuan, zu leh ruihhlo atana Mizote sum sen a tam thu sawiin, "Kum khata state pawn atanga zu lak luhna man ringawt pawh Synod kum khat budget aiin a tam fe zawk, drug atana sum sen pawh a tam hle. Chutih laiin, zu vangin kan thalaite an thi zawih zawih thung si. Pastor ten nausen baptisma chantir tur an nei tlem sâwt hle a, piang aia thi kan tam zawk phei chuan a la pawi dawn lutuk a ni," a ti.

Ningani zana inkhawmahh hian Synod executive secretary i/c KṬP Rev. B. Sangthanga'n kum 2018-19 kumpuan a hawn bakah, kumpuan behchhana Durtlang Branch-in film an chan 'An dawn chiang lo' tih a tlangzarh a; Synod Secretary (Sr.) Upa R. Dengzikpuia'n Synod Choir music video album a tlangzarh thung.

Nimin chawhma inkhawmah rawngbawlna report inkhawm neih a ni a, Central KṬP General Secretary Upa Zonunmawia'n report a pek danin, KṬP-ah hian member 1,47,665 an awm a, mipa 92,220 leh hmeichhia 55,445 an ni.

KṬP Conference ah hian vawiin chawhmaah kum 2018-2020 chhunga CKṬP hruaitu turte thlan a nih dawn bakah, rorel inkhawm neih ni ang a, zanin aṭangin speaker Rev. Vanlal­zuata'n thupui 'Isua chhinchhiah­na put' tih a sawi ṭan ang.

Inkhawmpuiah hian nimin chawhnu thleng khan palai riak lut 14,000 an tling tawh a ni.