Ram chhiat chhanah MNF leh Cong. puh

Nimin khan Bawngkawnah ZPM Steering Committee din thar a ni a, ZPM Hqrs. aṭanga hmanpuitu Cuasus member Vanlalhlana chuan, Mizoram chhiat chhanah MNF leh Congress-in mawh an phur thu a sawi.

Vanlalhlana chuan prime minister Rajiv Gandhi hun laiin Central Team of Minister rawn tirin, Mizoram tan hun remchang an rawn siam thu sawiin, "Congress-in engah mah an chantir lo. HD Deva Gowda hunlaiin NE state-te tan hamṭhatna a siam a, MNF sorkar Pu Zorama'n Peace Bonus tiin a ko a, thil ropui tih nan a hmang leh ta lo. NLUP sum atan vaibelchhe 3000 chuang engah mah chantir loin Congress-in hun an hmang liam leh a, kan ram dinhmunah hian Pu Hawla leh Pu Zorama hian mawh an phur a ni," a ti.

Thusawitu dang, ZPM general secretary K Sapdanga chuan ZPM lo dawngsawng a, lo ngaihventute chu kohhran mite an nih thu sawiin, "Anni hian ram siam an duh tawh a, a nawrin min nawr zawk a ni. Tin, sorkar office ah hian sorkar hnathawkten min welcome em em a, ram siam, hnathawh an chak ngawih ngawih a ni. Neutral chhungkuaah pawh pa aiin nu an mangang a, tu leh fate seilennan kan ram an sit a, min nghakhlel hle a ni," a ti a, Pathian duhzawng, hmanruaah min hmang duh mial mahna tia pen chhuak an nih thu a sawi.

K Sapdanga chuan kan ram chhiatzia sawiin, "Chiang taka India ramin tehna mumal tak a neih (official record)ah hian state rethei panga zingah a hniam ber kan ni ngar ngar chunga Pu Hawla tehna hmanga kan sang hi amah pawh lehlam hawi chunga a nuihzat ka ring. Chawmhlawm state kan ni tih te, hnam hrisel lo kan ni tih te hi midang ka aṭanga chhuak a ni lo. HIV AIDS vei kan tam em emte hian kan khawtlang nunah dan leh hrai thununna a chhia tih hi a chiang em em a, unah hian lawlessness state kan ni tih a chiang a ni," a ti.

MPP president Lalṭanpuia pawhin thu sawiin, "Kan ram hi a intodelh loh avangin kan rilru a chhe mek a, rinawmna, dikna, thawhrimna bul chu intodelh a ni. Sorkarin kan rilru a siamtha tur anih laiin moral reform kan mamawh em em a, sorkar hi kan moral tichhetu a ni zawk em tih a ngaihtuah theih ta hial a ni," a ti a, ṭanrual a, sorkar tha kan neih a ngaih thu a sawi.