KHAWTHLIR

UPC inkhawmpui
UPC North East India, North Mizoram District inkhawmpui chu Ningani zan aṭang khan Maubawka UPC biak-inah ṭan a ni a, thupui atan 'Rawngbawl tura chhandam' tih hman a ni a, District PYD leh Sunday School department-ten nimin khan ro an rel a, vawiinah hruaitu thar an thlang ang.

CM ngen
Champhai MZP chuan chief minister Lal Thanhawla hnenah lehkhathawnin, Champhaia building sak zawh tawh pathum polytechnic building, ITI building leh nursing school building-te chu a nih dan tur anga rei tak hman a nih tawh loh avangin building a chhe tawh hle tih an tarlang a, sak chhan a nih anga function tir turin an ngen.

Intlan chhawk tur
Traffic SP C Lalthanmawia chuan thupek chhuahin, March 7-31 zan dar 9 aṭanga zing dar 5 inkarah Bawngkawn Durtlang Road, Bawngkawn Reservior leh Bawngkawn North Traffic Point inkarah tui pipe phum hna an thawh dawn avangin helai kawngah hian lirthei intlan chhawk a ngai dawn thu tarlangin, "Helai kawnga lirthei khalhtu leh hmangtute fimkhur tak leh hnathawkte ngaichang chunga lirthei khalh leh hmang turin hriattir an ni," a ti.

Jubilee lawm
Govt. Model English Medium Primary School, Ramhlun North chuan Ningani khan an kum 50 (Golden Jubilee) tlin an lawm a; hun hmanpuitu Education minister H Rohluna chuan, sikul ṭha ni tur chuan zirna bakah nu leh pa ngaihṭha taka siam leh zirlai naupang thlamuang taka awm tir a pawimawh thu a sawi.

Tanpuina sem dan ngaihtuah
NEDP hnuaia Chief Minister Rural Housing Scheme chungchang ngaihtuahtuahin, March 1 khan addl. DC Lalsangpuii Hmar hoin official-te DC conference hall-ah an ṭhukhawm a, insak ṭanpuina sem dan tur an ngaihtuah. Champhai district-ah chhungkaw 415 ten in sakna tur Rs. 50,000 ṭheuh an dawng dawn a ni.