Hmun hrang hrangah Chapchar Kut hman a ni
Nimin khan Mizoram hmun hrang hrangah Mizo kut ngaihhlut ber Chapchar Kut hman a ni.
Joint YMA, Pangzawl chuan Chapchar Kut chu an khaw khelmualah an hmang a, an hun hmanpuitu minister PC Lalthanliana chuan khawvel a hnam changkangten an hnam thil hlu leh an hnam nun zia theihnghilh mai loin an ngaisangin an hlut tawlh tawlh ṭhin tih sawiin, "Mizote pawhin changkang leh hmasawn lam panin kan kut neihte kan hlutin kan ngaisang thiam hi a lawmawm takzet," a ti.
Thusawitu dang CYMA finance secretary Fabian Lalfakawma chuan kumin kut thupui 'Sem sem dam dam, ei bil thi thi' tih chu thinlunga vawnga midangte tana malsawmna nih tum ṭheuh turin kut chhimtute a chah.
Chapchar Kut programme hi mipui in an hlut hle a, Pangzawl leh khaw thenawm atangin mipui thahnem tak an kalkhawm a, Chapchar Kut lo chhuah dan sawifiah a ni.
Champhaiah chuan Chapchar Kut hi Kahrawt field-ah hman a ni a, Kut Pa chu YMA hruaitu hlun H Lianruma niin, Kut Thlengtu chu addl. DC Lalsangpuii Hmar a ni.
H Lianruma chuan kut thupui atana thlan ‘sem sem dam dam, ei bil thi thi’ lo chhuah dan leh piputen an lo nunpui thin dan te sawiin, kalkhawmte chu mahni tanghma chauh hai loa, Mizo taka midangte tana malsawmna nih tum thin turin a chah
Kut lawm tura lokal Naupang kum 6 hnuailam Mizo hnam incheia inchei nalh mipa leh hmeichhe naupang thlan chhuahte hnenah Kut Pa in lawmman a sem a. Chapchar Kut Miss 2018 hnenah lawmman hlan a ni bawk.
Chapchar Kut hi Vairengteah chuan an khaw khelmualah hman a ni a, an hun hmanpuitu minister Zodintluanga chuan, "Hnam reng reng, eng hnam pawh ni se, ama hnam thil a ngaihhlut thiam phawt chuan hnam dang pawhin an ngai hluin an zahsak ngei dawn a, chutiang hnam chu a boral ngai lo ang," a ti a, kan hnathawhna leh khawi lo kalnaah pawh Mizo thuam inbel ṭhin a ni chu lawmawm a tih thu a sawi.
Politics, kohhran leh pawl hrang hranga kan awm avangin Mizote min thenhrang lo se a duh thu sawiin Kut Pa chuan, "Kan kalna apiangah Mizo nih hi zak loin i chhuang ang u. Mizo hnam hmingṭhatna thlentu ni ang u, hnam dangte mithmuhah Mizo chu rintlak a nihzia i tifiah zel ang u," a ti.
Serchhipah chuan Leisekawt Mualah Chapchar Kut hi hman a ni a, Serchhip DC Sangchhin Chinzah chu Kut Nu a ni a, Serchhip Sub. Hqrs. YMA president R Sanghmingthanga chu Kut Thlengtu a ni.
Sangchhin Chinzah chuan kan hnamzia, kan rohlu hi kan tu leh fate tana chhawm nunga, an thinlunga tuhngheh a ṭul tih sawiin, "Zozemawi chi hrang hrang leh khawtlang inpawh tlanna ṭha pawimawhnate chhem alha tinung reng turin Chapchar Kut hi a pawimawh. Vawiin hi ṭangkai tak leh hlim takin mipuiten i hmang ila, kan fanau kan YMA chhangte hian hmun pawimawh luah tlat rawh se, " a ti.
Kut lawmnaah hian Serchhip branch hrang hranga YMA bhhangten tlanglam an entir a, MUP ten bawhhla nena Tlangtlirin Marian H/S naupangten darbu an tum a ni.
Chapchar Kut hi Siaha-ah chuan District Playground-ah hman a ni a, Kut Pa chu MADC CEM N Zakhai a ni a, Kut Thlengtu chu DRDA project director VL Hruaizela Khiangte a ni.
Kut lawmnaah hian district sikul hrang hrang aṭangin zirlai naupangten pawnto an entir a, hnam incheina leh hnam lam hrang hrangte chu MTP, M.CH.P., YLA, LWA, MHIP leh MGYA ten an entir a ni.
Mamitah chuan Chapchar Kut hi GSA Playground-ah hman a ni a, Kut Nu DC Lalbiaksangi chuan Chapchar Kut hi Mizo pi leh puten inremna kut atana an lo hman ṭhin thu sawiin, "Keini pawhin rem loh kan lo neihte rem leh nana kan hman chuan a lawmawmin kut hlu tak a ni dawn a ni," a ti.
Chapchar Kut lawmna hun hi hun hniha ṭhen a ni a, hun khatna hi Mamit Sub. Hqrs. YMA president Zatluanga'n kaihruaiin, Sub. Hqrs. MHIP president Sapliannguri'n kut thupui 'Sem sem dam dam, ei bil thi thi' tih hmangin thu a sawi.