Kawngpui ṭha leh tlo kan siam ang - Dr. R Lalthangliana

MNF vice president Dr. R Lalthangliana chuan, fur pui hmachhawn ngam lo leh mawhphurhna la ngam loah Congress sorkar an puh a, "Inthlan hunah Congress an tla dawn a, MNF sorkar hunah kawngpui tha leh tlo zawk kan siam ang," a ti.

Nimina Kawrthah khuaa SEDP training an buatsaihnaah thu sawiin Dr. R Lalthangliana chuan, "Congress sorkar chuan kum kaw chhung teh meuh kawng siam a tum loa, mipuiin kan sawisel nasa em em a, mipuiten kan tawrh hrep hnu, NGO leh eptu party-te'n siam tha tura vawi tam kan nawr hnuah pawh kawng siam that an la tum chuang lo. Tun hnaiah MLA election hnai tawh takah furpui hmachhawn ngam loin kawngpui langsar lai lai siamṭhat hna an thawk ṭan leh mek," a ti a, an kawng siamte hi a daih rei loh tur thu a sawi.

MNF chuan ṭha taka kawng siam turin sorkar an phut thu sawiin MNF Vice President chuan, "Congress sorkar hian kawng chhiatah mawh­phurhna a la ngam ngai loa, an hotuten fur laia kawng siam a theih loh thu an sawi ṭhin a, kha chen ṭhal a awm a, fur leh ṭhal hre hrang lo sorkar an ni. He sorkar hi Zoram mipuiin kan chhangkham tawh a, kumin MLA Election-ah India ram state dang ang bawkin Mizoramah he sorkar hi kan paih thla ngei ang. MNF Kan sorkar hunah kan kawngpuite hi chhe ve tawh mai mai lo tur, ṭha leh tlo zawk Zoram pumah kan siam dawn a ni", a ti.